Kikao cha Wadau wa Maendeleo Chalinze Chafanyika

Imewekwa: November 19th, 2020

Kikao cha wadau wa Maendeleo katika halmashauri ya Chalinze kimefanyika leo katika Ukumbi wa Halmashauri katika eneo la Vilanda.Kikao hicho kinafanyika kama sehemu ya maandalizi ya mpango na bajeti kwa mwaka 2021/2022.

Kikao hicho kimejumuisha wadau mbalimbali wa Maendeleo katika Jamii kama wafanyabiashara wakubwa,wajasiriamali, viongozi wa dini, viongozi wa asasi zisizo za kiserikali na viongozi wa kisiasa.

Akifungua kikao hicho cha wadau Kaimu Mkurugenzi wa Halmashauri hiyo kwa niaba ya Mkurugenzi Mtendaji wa Halmashauri,Bwana Shabani Millao amewataka wadau kuanzisha vitega uchumi ambavyo vitainua uchumi wa Halmashauri ya Chalinze,na kuwataka wananchi wa Chalinze kuweka mazingira ambayo yatakuza mzunguko wa fedha katika halmashauri yetu na hatimaye kukuza uchumi." Wadau wa Maendeleo Chalinze inakuwa wilaya muda si mrefu na kutakuwa na msongamano wa watu wengi,hivyo wekezeni kwa kujenga hoteli na nyumba za kulala wageni uhitaji ni mkubwa na fursa ni za kutosha." Millao alisema.

Baada ya ufunguzi wa kikao hicho, Kamati ya Uwekezaji ya Halmashauri iliwasilisha mapendekezo ya utekelezaji wa miradi mbalimbali kama dira ya ufanisi katika halmashauri ya Chalinze, mapendekezo ya miradi hiyo ni pamoja na uwekaji wa taa za barabarani,Msata,Mdaula, Lugoba,Vigwaza, Chalinze na Kiwangwa,Ujenzi wa maegesho ya magari,Mradi wa upimaji viwanja, Ujenzi wa eneo la mapumziko (Recreation center), Ujenzi wa uwanja wa michezo, Ujenzi wa vibanda vya maduka, Ujenzi wa stendi ya Bwilingu na uanzishaji wa kituo cha Redio Chalinze.

Naye Mwenyekiti wa wafanyabiashara katika halmashauri ya Chalinze Bwana Lawrence Peter aliipongeza Kamati ya Uwekezaji kwa maono yenye tija kwa maslahi ya wananchi wa Chalinze nakuweka msisitizo kwa Halmashauri kuwa na Mpango kabambe (Master plan) ya Mji wa Chalinze na kuyapima maeneo yote ya Taasisi za serikali ili kuyalinda na uvamizi unaoweza kufanywa na watu wenye nia ovu.

Kwa Upande wake Diwani Mteule wa kata ya Pera, Mheshimiwa Jackson Mkango aliunga mkono juhudi za makusudi zinazofanywa na halmashauri ya Chalinze Katika kuwaletea Maendeleo wananchi na kutoa ushauri wa namna ya kuboresha miundombinu ya barabara katika Mamlaka ya Mji mdogo wa Chalinze,ili maeneo yote ndani ya Mji wa Chalinze na vitongoji vyake yaweze kufikika kwa urahisi.

Naye Mwalimu John Kirumbi,ambaye ni Mwalimu wa shule ya Msingi Chalinze aliipongeza Halmashauri kwa kazi nzuri inazofanya sanjari na ujenzi wa soko la Bwilingu,aliwata watu wa Mipango Miji wanapokuwa wanapima na kuandaa michoro ya mpango kabambe wazingatie kutenga maeneo kwa ajili ya maziko kwani Mji unakuwa na Idadi ya watu inaongezeka.

Aidha Wadau wa Maendeleo waliitaka Halmashauri kubuni vyanzo vipya vya mapato ili kuwa na mapato ya kutosha kutekeleza miradi pendekezwa yote iliwasilishwa na Kamati ya Uwekezaji ya Halmashauri.