Kikao Kazi cha Maafisa Elimu Kata na walimu wakuu chafanyika Chalinze

Imewekwa: January 16th, 2023

Kikao kazi cha walimu wakuu wa Shule za Msingi na Maafisa Elimu Kata kimefanyika leo katika Ukumbi wa Shule ya Sekondari Lugoba,kikao kazi hicho kimehusisha Maafisa Elimu Msingi,Wathibiti Ubora wa Elimu na Chama cha Walimu. Kikao kazi hicho kimezinduliwa na Mkurugenzi Mtendaji wa Halmashauri ya wilaya ya Chalinze,Bwana Ramadhani Possi.

Katika kikao kazi hicho kimefanyika kwa malengo ya kufanya tathmini ya masuala mbalimbali ya Elimu sanjari na kufanya tathmini ya matokeo ya wanafunzi wa darasa la nne kitaifa kwa mtihani uliofanyika Mwaka jana, ujazaji wa mikataba ya utekelezaji wa Majukumu ya ufundishaji.

Katika hotuba yake ya ufunguzi wa kikao kazi hicho,Mkurugenzi alianza kikao kazi hicho kwa kuwatambua na kuwapongeza Maafisa Elimu Kata na Walimu wakuu kwa uandikishaji wa wanafunzi wa Elimu awali na darasa la kwanza kwa kuandikisha wanafunzi zaidi ya asilimia mia moja. Pamoja na kuwapongeza walimu hao aliwataka kuendelea kuhamasisha suala la wanafunzi kuripoti kwa wakati na kutokana na uandikishaji.

Baada ya uzinduzi wa kikao kazi hicho Mkurugenzi aliwasainisha Maafisa Elimu na walimu mikataba ya utendaji kazi kama kiashiria cha utekelezaji wa Majukumu (Key Performance Indicators) kwa kila Mwalimu . Kwa mikataba hiyo kila Mwalimu atapimwa kulingana na mkataba wake na Majukumu yake.,

Aidha Mkurugenzi Mtendaji baada ya kumaliza zoezi la kusainisha mikataba aliweza kugawa Vishikwambi zaidi ya 600 kwa walimu wa Shule za Msingi katika Halmashauri ya wilaya ya Chalinze vilivyotolewa na Serikali kwa ajili ya kuboresha tendo la kujifunza kwa walimu na wanafunzi.

Naye Afisa Elimu Awali na Msingi wa Halmashauri ya Chalinze Mwalimu Miriam Kihiyo alimshukuru Mkurugenzi kwa kazi zote alizozifanya katika kikao kazi hicho na kuahidi kuyafanyia kazi maelekezo yote ya Serikali ili kuinua kiwango cha ufaulu katika Halmashauri ya Chalinze,sanjari na kusimamia utekelezaji wa mikataba kwa walimu na Maafisa Elimu kata ili kufikia malengo ya Serikali kutokana na mkataba wa utendaji kazi.