Kilaja Atoa wito wa kuimarisha Matumizi ya PEPMIS kwa watendaji wa Kata na Vijiji Chalinze

Imewekwa: November 18th, 2024

Mkuu wa Divisheni ya Utawala na Rasilimali Watu, Bw. Archanus Kilaja, leo Novemba 18, 2024, amekutana na Watendaji wa Vijiji na Kata katika kikao kilicholenga kuhimiza umakini katika matumizi ya Mfumo wa Usimamizi na Utendaji Kazi katika Utumishi wa Umma (PEPMIS). Lengo la kikao hicho ni kuhakikisha watendaji hao wanakidhi viwango vinavyotakiwa kabla ya tathmini ya pili ya mwaka ili kuepuka changamoto za kiutendaji na kinidhamu zinazoweza kujitokeza.

Bw. Kilaja amebainisha kuwa baadhi ya watendaji hawajajiunga kwenye mfumo huo, huku wengine wakikumbana na changamoto za kupata alama zinazokidhi viwango. Ameonya kuwa matokeo ya kupata alama ndogo yanaweza kusababisha adhabu za kinidhamu zisizofaa kwa watumishi wa umma. Hivyo, amesisitiza umuhimu wa kuimarisha juhudi za kuingia kwenye mfumo na kufikia viwango vya utendaji vinavyokubalika.

Aidha, amewataka Watendaji wa Vijiji kushirikiana na Watendaji wa Kata kuhakikisha taarifa zao zinaidhinishwa kwa wakati ili kupatiwa alama zinazostahili. Pia, amesisitiza kuwa kila ofisi ya umma ibandike matangazo ya maelekezo kwa wananchi pale inapofungwa muda wa kazi, kuweka bendera ya taifa, na picha za viongozi wakuu wa nchi ili kuonyesha uhalali wa ofisi hizo.

Mfumo wa PEPMIS umeelezwa kuwa chombo muhimu cha kuwezesha taasisi za umma na watumishi kupanga, kufuatilia, na kutathmini utekelezaji wa mipango yao ya kazi. Mfumo huu pia hutoa mrejesho wa utendaji kazi, hivyo kuwa msingi wa uwajibikaji na maendeleo endelevu katika utumishi wa umma.