Kuwacheza Watoto wa Kike ni Kikwazo kwa Maendeleo ya Elimu Chalinze

Imewekwa: September 19th, 2018

Kuwacheza watoto wa kike ni moja ya sababu inayopelekea kushuka kwa ufaulu wa wanafunzi katika halmashauri ya wilaya ya Chalinze. Wazo hili limebainika katika kongamano la wadau wa maendeleo lililofanyika jana katika Shule ya Msingi ya Msoga  kata ya Msoga.

Kongamano hilo limeandaliwa na uongozi wa kata ya Msoga kwa misingi ya kubaini changamoto ambazo ni kikwazo kwa maendeleo ya wanamsoga na wanachalinze kwa ujumla,kwa kuchambua changamoto zinazokwamisha utekelezaji wa shughuli za kimaendeleo katika sekta za Elimu,Utawala Bora,Kilimo na Mifugo.

Katika kongamano hilo washiriki walianza kwa kubainisha changamoto zinazosababisha ufaulu duni kwa Elimu ya msingi na Sekondari.Akichangia katika kongamano hilo Mzee Herman Magomi alisema" Katika suala la utoaji Elimu kwa watoto linahusisha makundi matatu kwa maana ya walimu,wazazi na serikali,kama kutakuwa na ushirikiano wa kutosha suala la kutoa Elimu bora kwa watoto wetu linawezekana na ufaulu utapanda vinginevyo kama kutakuwa na kutothaminiana na kukwepa kutekeleza majukumu ya kila kundi hakutakuwa na ufanisi."Hermani alisema.

Naye Mwalimu Faraja Makala wa shule ya Msingi Lunga, alisema katika suala la kuhakikisha tunakuwa na ufaulu kwa watoto wetu ni kuwa na nidhamu ya kutekeleza majukumu yetu kama walimu, kwa maana ya kuingia darasani na kufundisha na wazazi kusimamia nidhamu ya watoto wao na kuwa karibu nao katika kuwashauri na kuwaeleza umuhimu wa Elimu katika jamii,lakini pia serikali itekeleze majukumu yake kwa kuhakikisha uwepo wa walimu kulingana na ikama kwa Shule husika sanjari na kushughulikia maslahi ya walimu kwa wakati na motisha mbalimbali kwa mujibu wa miongozo ya serikali."Yakitekelezwa haya kwa wakati na kila mmoja akatekeleza majukumu yake ufaulu utapanda." Faraja alisema.

Bi Grace Msinge,alisisitiza kwa kusema mabadiliko ya mitaala kwa Shule zetu na utumiaji wa vitabu mbalimbali katika ufundishaji na kujifunza ni moja ya changamoto zinazosababisha ufaulu duni tofauti na miaka ya zamani ambapo vitabu vilivyotumika vilikuwa ni vya aina moja,hata sasa ili kuinua ufaulu hatuna budi kuishauri serikali kutumia vitabu vya aina moja na kuachana na mabadiliko ya mitaala yasiyokuwa na tija.

Kwa upande wake Diwani wa kata ya Msoga,Hassani Mwinyikondo alitoa maoni yake katika kongamano hilo kwa kuwataka wazazi kuachana na tamaduni potofu za kuwacheza watoto wa kike wanapofikia umri wa kuvunja ungo wangali bado wanasoma Elimu ya Msingi hivyo kuwaathiri kisaikolojia na kushindwa kuendelea na masomo."Mtoto anapochezwa kwa mujibu wa utamaduni wa kabila la wakwele anakuwa yupo tayari kwa kuolewa na kuandaliwa kama mwali anaye subiri kuolewa,ili watoto wa kike waweze kusoma sisi kama wadau wa Elimu hatuna budi kupeleka mapendekezo ya kutunga sheria ndogo itakayo piga marufuku mtoto anayesoma Shule ya Msingi asichezwe mpaka atakapomaliza kidato cha nne."Mwinyikondo alisema.

Katika mjadala huo Kaimu Afisa Elimu Msingi,Edwin Kayuwi alitoa mchango wake katika kongamano hilo kwa kuungana na maoni ya wadau kwa changamoto zilizowasilishwa na kuwataka wazazi wawe chachu ya mafanikio katika kuinua kiwango cha ufaulu kwa kushirikiana na walimu katika kuijenga nidhamu ya mwanafunzi kama walezi lakini pia kuachana na tamaduni ambazo zinakuwa kikwazo cha mtoto katika kujifunza na tamaduni hizo zifanyike baada ya mtoto kuwa amefikia umri wa kujitambua na kujua baya na jema."Nasisitiza walimu kufundisha kwa bidii kwa kufuata miongozo ya Taaluma ualimu na kama idara ya Elimu Msingi tutaendelea kufanya marekebisho ya ikama kwa kadiri tunavyopata Fedha za uhamishi.",Kayuwi alisema.

Naye Diwani wa viti maalum na Mwenyekiti wa kamati ya Elimu,Afya na Maji Bi.Rehema Mno kwa niaba ya mwenyekiti wa halmashauri ya Chalinze aliwashukuru washiriki wa kongamano kwa kuwa wabunifu na kuandaa kongamano la kujadili changamoto zinazowakabili katika kata yao na kutafuta suluhu ya changamoto hizo na kuahidi kuwaunga mkono katika mapendekezo yao ya utatuzi wa kero kwa kushirikiana na ofisi ya mkurugenzi mtendaji wa halmashauri ya Chalinze na kuwataka wadau wa Elimu kuwa mabalozi katika mapambano dhidi ya tamaduni mbovu zinazoathiri utoaji wa Elimu katika halmashauri yetu na kuwataka madiwani katika kata zingine kuiga mfano wa kata ya Msoga.

Kaimu Mkurugenzi wa halmashauri ya wilaya ya Chalinze Bwana Saidi Mwakapugi akichangia katika kongamano hilo aliahidi kuyapokea yote yaliyojadiliwa na kuyafikisha kwa Mkurugenzi mtendaji kwa hatua zaidi kwa maslahi ya wanachalinze kwa ujumla.