Maadhimisho ya Miaka 61 ya Uhuru wa TanzaniaYafana Chalinze

Imewekwa: December 9th, 2022

Maadhimisho ya miaka 61 ya Tanzania yafanyika na kufana vema katika wilaya ya Bagamoyo,maadhimisho hayo yamefanyika kiwilaya katika Halmashauri ya Wilaya ya Chalinze na kuchagizwa na vikundi mbalimbali vya sanaa sanjari na uwasilishwaji wa taarifa mbalimbali za mafanikio yaliyofikiwa na Serikali ndani ya miaka 61 ya Uhuru.

Katika hafla hiyo iliyofanyika katika Ukumbi wa Mikutano wa Shule ya Sekondari ya Lugoba mbele ya mgeni rasmi,Katibu Tawala wa Wilaya ya Bagamoyo,Bi. Kasilda Jeremiah Mgeni. Kulifanyika shughuli mbalimbali kama michezo ya mpira wa miguu,upandaji miti,usafi wa mazingira na kongamo lililohusisha wananchi wote katika upokeaji wa mafanikio yaliyofikiwa na Serikali katika kuwahudumia wananchi na wananchi walipata fursa ya kutoa maoni yao kwa mafanikio ya Serikali katika sekta mbalimbali.

Katika kongamano hilo wataalam katika sekta mbalimbali walipata fursa ya kutoa maada mbalimbali kisekta na jinsi mafanikio yalivyopatikana ndani ya miaka 61 ya uhuru,maada zilizowasilishwa ni Siasa na Utawala Bora,Ufanisi katika Huduma za Jamii(Afya,Maji,Elimu na Nishati,Hali ya Uchumi,Kilimo,Viwanda,Biashara na Miundombinu.

Aidha wananchi walipata fursa ya kutoa maoni mbalimbali kuhusiana na mafanikio yaliyofikiwa ndani ya miaka 61 sanjari na kauli Mbiu ya maadhimisho hayo ambayo ni:”Amani na Umoja ni Nguzo ya Maendeleo yetu.”

“Serikali yetu imepiga hatua kubwa katika suala la Utawala bora,kwani mwanzo maelekezo yalitoka juu kushuka chini lakini kwa sasa wananchi tunaweza kutoa mahitaji yetu kutoka chini kwenda juu kutokana na vipaumbele vyetu na yakafanyiwa kazi hii ni hatua kubwa kiutawala ndani ya miaka 61 ya Uhuru wetu.” Shekh Nassoro alisema.

Kwa upande wake Mgeni Rasmi katika kongamano hilo kwa niaba ya Mkuu wa wilaya,Bi. Kasilda Mgeni aliwapongeza watoa mada wote katika kongamano hilo kwa kuweza kuyabainisha mafanikio ya Serikali kwa kina kisekta ndani miaka 61 ya uhuru wa Taifa la Tanzania na kuwataka washiriki wote kuwa mabalozi katika kuyasema mafanikio hayo hadharani kwani ndiyo uhalisia uliopo.

“Ndugu washiriki niwapongeze wote kwa jinsi mlivyoweza kuyasema kwa kina mafanikio ya Serikali katika nyanja mbalimbali za maisha,pia niwapongeze viongozi wote waliowahi kuliongoza Taifa hili kuanzia muasisi wa Taifa hili Hayati Baba wa Taifa Mwalimu Julius Kambarage Nyerere,Mzee Ali Hassan Mwinyi,Hayati Benjamin William Mkapa,Dkt.Jakaya Mrisho Kikwete,Hayati Dkt.John Pombe Joseph Magufuli na Dkt.Samia Suluhu Hassan kwa juhudi mbalimbali walizozifanya na zinazoendelea kufanyika katika kuliletea matokeo chanya Taifa hili.” Mgeni Rasmi alisema.