Maafisa Ugani waishukuru Serikali kwa kuboresha sekta ya Kilimo

Imewekwa: September 9th, 2024

Na: John Mlyambate

Maafisa ugani wa kilimo Chalinze wametoa shukrani zao za dhati kwa Rais Dkt. Samia Suluhu Hassan kwa juhudi zake za kuimarisha sekta ya kilimo. Walitoa shukrani hizo wakati wa hafla ya kukabidhiwa sare maalum na Mkurugenzi Mtendaji wa Halmashauri ya wilaya ya Chalinze, Bwana Ramadhani Possi, katika ukumbi wa mikutano wa Jakaya Kikwete.

Mkurugenzi Possi alitumia fursa hiyo kutoa shukrani kwa Serikali kwa jitihada zinazofanywa katika kuboresha sekta ya kilimo. Alisisitiza kwamba Serikali kupitia Wizara ya Kilimo imeweza kugawa vifaa muhimu kama Kipima Udongo (Soil Scanner) na vishikwambi kwa maafisa ugani, jambo ambalo litasaidia katika kuboresha huduma kwa wakulima.

Katika hotuba yake, Possi alifafanua kwamba Serikali inatarajia kugawa pikipiki 53 kwa maafisa ugani, ili kuwasaidia katika kufikia wakulima kwa wakati. Alibainisha kuwa uhakiki wa maafisa ugani umekamilika, na hatua hii itaimarisha ufanisi wa kazi zao.

Bwana Possi alihimiza maafisa ugani kufanya kazi kwa weledi, ili waweze kuwasaidia wakulima kuzalisha kwa tija na kufanikisha kilimo cha biashara. Aliwakumbusha pia umuhimu wa kushiriki katika uchaguzi wa Serikali za Mitaa unaotarajiwa kufanyika tarehe 27/11/2024, akisisitiza kwamba ushiriki wao ni muhimu katika kuimarisha demokrasia na maendeleo ya kilimo nchini.