Maafisa Ugani Wapewa Pikipiki Chalinze

Imewekwa: February 7th, 2020

MKURUGENZI wa Halmashauri ya Chalinze Amina Kiwanuka amesema, shughuli za ugani katika Halmashauri hiyo zimekuwa na changamoto ikiwemo ya namna ya kuwafikia Wakulima ambao wapo katika Vijiji na Vitongoji huku maeneo mengine yakiwa hayana Maofisa Ugani.

Kiwanuka alibainisha hayo jana, wakati wa makabidhiano ya pikipiki kwa Maafisa Ugani, kutoka katika  vijiji  10  vilivyopo pembezoni ya Halmashauri hiyo.

Alisema, kutokana na changamoto ya Wakulima kutotembelewa kwa wakati,   wamekuwa hawapati huduma yenye tija kwa kutembelewa mara chache na wataalamu, na hivyo kuwa na uzalishaji hafifu.

Hali hiyo imepelekea Halmashauri  kupitia idara ya kilimo, kujiwekea malengo hadi kufikia 2021/2022 iweze kununua pikipiki 50, kutoka kwenye mapato yake ya ndani kwa ajili ya Maafisa Ugani waliopo katika Kata na Vijiji.

Mkurugenzi huyo alisema, katika bajeti ya mwaka 2019/2020, Halmashauri hiyo ilitenga kiasi cha shilingi milioni 25 ambazo zimenunua pikipiki 10 kwa ajili ya Maofisa Ugani  katika vijiji vya pembezoni na zimekabidhiwa.

Aidha katika bajeti ya 2020/2021 kiasi cha shilingi milion 32 zimetengwa kwa ajili ya ununuzi wa pikipiki kumi, na kwamba wanatarajia kutenga fedha nyingine Shilingi milion 35.1 kwa ajili ya pikipiki 13 katika mwaka wa fedha 2021/2022 ili kukamilisha idadi ya pikipiki 50.

"Pikipiki hizi zitawasaidia Maafisa Ugani kuwatembelea Wakulima kwa wakati na  kuwapa huduma ambazo zitawawezeaha kuongeza tija katika shughuli zao za kilimo, na pia wataweza kufika katika Vijiji ambavyo havina Maofisa Ugani" alisema Mkurugenzi.

Mwenyekiti wa Halmashauri hiyo Said Zikatimu alitoa wito kwa maafisa ugani waliopata pikipiki hizo, kuhakikisha  wanazitumia kwa malengo yaliyokusudiwa, na kuepuka kuzitumia kama za biashara kwa kubeba abiria na kufanyia shughuli binafsi.

Zikatimu alisema, wananchi bado wanalima kilimo cha mazoea kutokana na kukosa wataalamu wa kuwapa elimu, upatikanaji wa pikipiki hizo utasaidia kukuza uchumi kupitia kilimo kwa Wakulima kupata elimu na ushauri.

Mmoja wa maafisa Ugani Aloyce Jumanne wa Kijiji Cha Kimange, aliishukuru Halmashauri hiyo kwa kuwawezesha kuwapatia usafiri ambao utawarahisishia utendaji kazi wao.

Mbali ya pikipiki hizo kumi, Halmashauri hiyo pia imepokea magari mawili Kati ya matatu, waliyoyanunua kupitia fedha za mapato ya ndani ya Halmashauri hiyo.