Mabaraza ya Kata yapata mafunzo Chalinze

Imewekwa: November 22nd, 2024

Mwenyekiti wa Baraza la Ardhi na Nyumba wilaya ya Bagamoyo awafunda wajumbe wa mabaraza ya kata Chalinze

Mwenyekiti wa Baraza la Ardhi na Nyumba amewataka wajumbe wa Mabaraza ya kata wa Halmashauri ya wilaya Chalinze kuzingatia sheria taratibu na kanuni za Usuluhishi katika mabaraza ili Kumaliza Migogoro katika Jamii.

Mwenyekiti amewataka wajumbe kuwa wasuluhishi na siyo waamuzi,kwani kwa mujibu wa Sheria ya Mahakama ya Migogoro ya Ardhi sura ya 216,mabaraza ya kata yanasikiliza Migogoro na kusuluhisha na ikishindikana baraza litatoa hati ya kushindikana Usuluhishi wa mgogoro kwa hatua zaidi.

Mwenyekiti katika Mada yake aliwapa maarifa ya namna ya uendeshaji wa mabaraza ya kata katika Usuluhishi wa Migogoro kwa misingi ya Sheria na kuepusha Migogoro inayoweza kutokea katika utekelezaji wa Majukumu ya mabaraza ya usuluhishi wa kata.

Kwa upande wake Kamanda wa TAKUKURU Chalinze,Bi Swai alipata fursa ya kuwakumbusha wajumbe wa mabaraza ya kata kuzingatia maadili ya utendaji kazi ikiwa ni pamoja na kuzuia na kupambana na vitendo vya rushwa katika usuluhishi wa Migogoro mbalimbali katika Jamii.

Naye Afisa Sheria wa Halmashauri ya wilaya ya Chalinze,Wakili Elizabeth Lukumai aliwakumbusha wajumbe wa mabaraza ya kata kuhusu majukumu yao kuwa ni kuhifadhi amani katika eneo la kata ikiwa ni pamoja na malalamiko madogo madogo kama ugoni,masuala ya ndoa na migongano inayoweza kusuluhishwa na kuimarisha amani katika Jamii.