Madiwani wa Halmashauri ya Chalinze watoa Maelekezo ya kulipa madeni yote

Imewekwa: August 31st, 2024

Na: John Mlyambate

Madiwani wa Halmashauri ya Chalinze wameelekeza Halmashauri hiyo kuhakikisha inalipa madeni yote inayodaiwa, ikiwemo madai ya watumishi, ambapo deni lililobainishwa ni shilingi bilioni 3.3. Mwenyekiti wa Halmashauri hiyo, Hassan Mwinyikondo, alitoa rai hiyo tarehe 30 Agosti wakati wa Baraza maalumu la kupokea taarifa za fedha.

Mwinyikondo aliipongeza Halmashauri kwa juhudi zake za kuendeleza mali za kudumu na kupunguza madeni kila mwaka, akisisitiza kwamba hatua hizo zinaimarisha maendeleo yanayoweza kutatua kero za wananchi. Kaimu Mkurugenzi wa Halmashauri hiyo, Archanus Kilaja, aliahidi kwamba maelekezo ya Madiwani yatafanyiwa kazi kwa kutenga fedha za kulipa madeni yaliyopo.

Katika taarifa ya fedha kwa mwaka wa fedha 2023/2024 iliyowasilishwa na Mwekahazina, Bi. Rehema Lucian, ilibainishwa kwamba madeni yanayodaiwa ni shilingi bilioni 3.3, ikiwa ni ongezeko la asilimia 16.46 ikilinganishwa na mwaka wa fedha 2022/2023 ambapo madeni yalikuwa shilingi bilioni 2.8. Kati ya madeni hayo, shilingi milioni 357.3 ni ya watumishi na shilingi milioni 945,059,252.45 ni ya wazabuni.

Halmashauri inaendelea kudai shilingi bilioni 3.2, sawa na punguzo la asilimia 11.26 ikilinganishwa na madeni yaliyokuwa yanadai wateja na wadau mbalimbali katika mwaka wa fedha 2022/2023. Bi. Rehema alisisitiza kwamba kwa mwaka wa fedha 2023/2024, Halmashauri iliweka makadirio ya makusanyo ya mapato ya ndani ya shilingi bilioni 15.6 na kufanikiwa kukusanya shilingi bilioni 16.2, sawa na asilimia 103 ya makadirio ya bajeti, ikiwa ni ongezeko la asilimia 16.59 ikilinganishwa na shilingi bilioni 13.9 ya makusanyo ya mwaka wa fedha 2022/2023.