Madiwani wa Masasi wajifunza mbinu za Ukusanyaji Mapato Chalinze

Imewekwa: December 8th, 2024

Madiwani wa Halmashauri ya Wilaya ya Masasi mkoani Mtwara leo wamefanya ziara ya mafunzo katika Halmashauri ya Wilaya ya Chalinze, Pwani, kwa lengo la kujifunza mbinu za ukusanyaji wa mapato na vyanzo mbalimbali vya mapato vinavyosaidia kuinua uchumi wa halmashauri hiyo.

Ziara hiyo imejumuisha madiwani 49 pamoja na wataalam wa Halmashauri ya Masasi wakiongozwa na Mkurugenzi Mtendaji wa halmashauri hiyo, Bi. Beatrice Mwinuka. Katika kikao cha ukaribisho, Mwenyekiti wa Halmashauri ya Chalinze, Mheshimiwa Hassani Mwinyikondo, aliwakaribisha wageni na kuelezea historia na mafanikio ya Chalinze tangu kuanzishwa kwake mwaka 2016.

Kwa mujibu wa Mheshimiwa Mwinyikondo, Halmashauri ya Chalinze ilianza kwa kukusanya mapato ya shilingi bilioni 3.8 kwa mwaka wa fedha 2016/2017, na sasa inatarajia kufikia makusanyo ya shilingi bilioni 17.2 kwa mwaka wa fedha 2024/2025. Alibainisha kuwa mafanikio hayo yanatokana na ushirikiano kati ya madiwani na wataalam wa halmashauri, pamoja na uwekaji wa mifumo madhubuti ya ukusanyaji mapato.

“Mafanikio haya ni matokeo ya kazi ya pamoja kati ya viongozi wa kisiasa na wataalam. Tunazingatia uwazi na uwajibikaji katika kila hatua ya ukusanyaji wa mapato,” alisema Mheshimiwa Mwinyikondo.

Naye Mwenyekiti wa Halmashauri ya Wilaya ya Masasi, Mheshimiwa Ibrahim Chiputula, aliishukuru Halmashauri ya Chalinze kwa kuwapa fursa ya kujifunza. Alisema kuwa mafunzo hayo yatachangia kuboresha mifumo ya ukusanyaji wa mapato katika Halmashauri ya Masasi.

“Ziara hii imetufungua macho. Tunawashukuru sana kwa ushirikiano wenu na tutaenda kutumia mafunzo haya kuboresha halmashauri yetu,” alisema Mheshimiwa Chiputula.

Madiwani wa Masasi pia walipata fursa ya kutembelea baadhi ya vyanzo vya mapato vya Halmashauri ya Chalinze na kujifunza mifumo ya kiutendaji inayotumika kuhakikisha mapato yanakusanywa kwa ufanisi.

Ziara hiyo imelenga kubadilishana uzoefu baina ya halmashauri hizo mbili ili kuimarisha utendaji wa serikali za mitaa nchini.