Madiwani wa Pangani waipongeza Chalinze kwa Miradi ya mapato ya ndani

Imewekwa: June 11th, 2025

Na John Mlyambate,Chalinze

Kamati ya Fedha, Uongozi na Mipango ya Halmashauri ya Wilaya ya Pangani imefanya ziara ya mafunzo katika Halmashauri ya Wilaya ya Chalinze, mkoani Pwani, kwa lengo la kujifunza mbinu mbalimbali za ukusanyaji wa mapato ya ndani na utekelezaji wa miradi ya maendeleo inayotokana na mapato hayo. Ziara hiyo ilifanyika hivi karibuni na ilijumuisha madiwani pamoja na wataalam kutoka Halmashauri ya Pangani.

Ziara hiyo iliongozwa na Mwenyekiti wa Halmashauri ya Wilaya ya Pangani, Mheshimiwa Akida Omari Bahorera, ambaye aliongozana na wajumbe wa kamati yake pamoja na watendaji wa halmashauri hiyo. Katika ziara hiyo, walitembelea miradi mbalimbali ya maendeleo inayosimamiwa na Halmashauri ya Chalinze kwa kutumia mapato ya ndani.

Miongoni mwa miradi waliyoitembelea ni pamoja na ujenzi wa vyumba 80 vya maduka katika stendi ya mabasi ya Halmashauri iliyopo katika Mamlaka ya Mji Mdogo wa Chalinze, pamoja na soko la Bwilingu. Miradi hii inatajwa kuwa mfano bora wa matumizi ya mapato ya ndani katika kuboresha huduma kwa wananchi na kuongeza vyanzo vya mapato kwa halmashauri.

Aidha, madiwani hao walitembelea vizuia vya kukusanyia mapato ya ndani vilivyopo maeneo ya Lugoba na Kinzagu. Katika maeneo hayo walipata fursa ya kujifunza kwa kina mfumo wa ukusanyaji wa mapato, ikiwemo matumizi ya teknolojia na usimamizi wa vyanzo vya mapato ili kuhakikisha halmashauri inajitegemea kifedha.

Baada ya ziara hiyo, Mwenyekiti wa Halmashauri ya Pangani, Mheshimiwa Bahorera, alitoa pongezi kwa Halmashauri ya Chalinze kwa ubunifu na ufanisi katika ukusanyaji na usimamizi wa mapato ya ndani. Alisisitiza kuwa Pangani imejifunza mambo mengi yenye manufaa ambayo wataenda kuyatekeleza katika halmashauri yao ili kuboresha utoaji wa huduma kwa wananchi.

“Hakika tumejifunza mengi kutoka kwenu. Tunahakikisha mazuri haya tuliyoyaona tunayachukua na kuyatekeleza kwa manufaa ya wananchi wa Pangani na Watanzania kwa ujumla,” alisema Mheshimiwa Bahorera kwa niaba ya wenzake.

Ziara hii ni sehemu ya juhudi za Halmashauri ya Pangani kujifunza na kuboresha mifumo yake ya ndani ya mapato pamoja na utekelezaji wa miradi ya maendeleo, kwa lengo la kuwaletea wananchi maendeleo endelevu na kuboresha maisha yao kwa kutumia rasilimali zilizopo.