Mafunzo kwa wasimamizi wasaidizi ngazi ya kata yafunguliwa Rasmi

Imewekwa: August 4th, 2025

Na John Mlyambate 

Chalinze, Tanzania – Msimamizi wa Uchaguzi wa Jimbo la Chalinze, Bwana Jovin Bararata, leo tarehe 4 Agosti 2025, amezindua rasmi mafunzo kwa wasimamizi wasaidizi wa uchaguzi ngazi ya kata, ikiwa ni sehemu ya maandalizi ya Uchaguzi Mkuu wa mwaka 2025. Mafunzo haya yanawahusisha wasimamizi wasaidizi 30 kutoka kata zote 15 za Jimbo la Chalinze.

Akizungumza wakati wa uzinduzi wa mafunzo hayo, Bwana Bararata alisema kuwa mafunzo haya yatafanyika kwa siku tatu mfululizo na yanalenga kuwaandaa wasimamizi wasaidizi kwa kuwajengea uelewa wa kina juu ya wajibu wao, ili waweze kutekeleza majukumu yao kwa ufanisi, uadilifu na weledi wa hali ya juu.

Bwana Bararata alisisitiza kuwa kazi ya usimamizi wa uchaguzi ni jukumu nyeti linalohitaji uaminifu, uzingatiaji wa sheria, pamoja na kuheshimu kanuni na taratibu za uchaguzi. Alisema kuwa wasimamizi hao wanapaswa kuwa mfano wa kuigwa kwa kuonyesha uadilifu na kutenda kazi kwa misingi ya haki na usawa.

Aidha, alikumbusha kuwa uteuzi wa wasimamizi hao umefanywa kwa mujibu wa sheria, hivyo ni wajibu wao kuhakikisha kuwa wanazingatia Sheria ya Uchaguzi wa Rais, Wabunge na Madiwani pamoja na kanuni zote zinazosimamia uchaguzi. Alieleza kuwa kutokuwa na uelewa wa sheria hizo kunaweza kusababisha kasoro zisizohitajika wakati wa uchaguzi.

Msimamizi huyo wa Jimbo aliwahimiza wasaidizi hao kuzingatia kila somo litakalotolewa katika kipindi chote cha mafunzo na kuhakikisha wanashiriki kikamilifu katika mijadala na mazoezi ya vitendo ili kuongeza uelewa na kuondoa mashaka yoyote yanayoweza kujitokeza wakati wa utekelezaji wa majukumu yao.

Pia aliwakumbusha kuwa mafunzo hayo ni sehemu ya maandalizi ya kuhakikisha kuwa Uchaguzi Mkuu wa mwaka 2025 unafanyika kwa amani, haki na kwa kufuata taratibu zote za kisheria, hivyo kila msimamizi msaidizi anapaswa kujitambua kuwa yeye ni sehemu muhimu ya mchakato huo wa kidemokrasia.

Mafunzo hayo yanatarajiwa kuongeza ufanisi wa usimamizi wa uchaguzi katika ngazi ya kata na kusaidia katika kuhakikisha kuwa kila hatua ya uchaguzi inafanyika kwa uwazi, usahihi na kwa kuzingatia maslahi ya wananchi na taifa kwa ujumla.