Mafunzo ya UWaWa yaanza rasmi Chalinze

Imewekwa: March 24th, 2023

,Mafunzo ya Kujenga Umoja baina ya Wazazi na Walimu wa Shule za Msingi na awali (UWaWa)  Halmashauri ya Wilaya ya Chalinze yamefunguliwa rasmi hii leo na Mwenyekiti wa Halmashauri ya Wilaya ya Chalinze Mhe. Hassan Mwinyikondo katika ukumbi wa Shule ya Sekondari Lugoba.

Akizungumza wakati akifungua mafunzo hayo Mwenyekiti wa Halmashauri ya Wilaya ya Chalinze Mhe.Hassan Mwinyikondo amelishukuru  Shirika la Shule bora kupitia mratibu wa Shule  bora Mkoa wa Pwani Bi. Oliva Kapaya kwa kuandaa mpango huo ambao utajenga umoja.

“Kwa dhati kabisa nilishukuru Shirika hili kupitia mratibu wake hapa Pwani kwani mpango huu unakwenda kujenga umoja baina ya wazazi na Walimu katika kusaidia suala la Elimu ndani ya Halmashauri na Taifa kwa ujumla na hili ni kuunga jitihada za Rais wetu Mpendwa Mheshimiwa Samia Suluhu Hassan katika suala la Elimu nchini.”Alisema. Mhe Mwinyikondo

Hata hivyo Mhe. Mwinyikondo pamoja na Mwenyekiti wa Kamati ya Huduma za Jamii,Afya na Maji Mhe. Selestine Semiono  wamewataka Wenyeviti wote wa kamati za Shule kuwa mstari wa mbele katika kuhakikisha mafunzo yote wanayopatiwa yanakwenda kuufanyiwa kazai na kuwasilishwa  kwa wazazi wote ili waweze kuwa tayari kuendana na mpango huu wa Shule bora ili tuweze kuinua hali ya ufaulu katika shule zetu zote za chalinze na hatimaye kufikia daraja la juu la ufaulu.

Aidha Mhe.Mwinyikondo amesema kuwa wao kama Halmashauri watahakikisha kwa hali na mali wanaendelea kuunga mkono jitihada za shule bora kwa kuweka mpango wa ununuzi wa gari la kuchimba visima vya maji ili iweze kuchimba visima katika kila shule ili kuhakikisha upatikanaji wa maji ili watoto waendelee kula shuleni pamoja na kutoa zawadi kwa walimu na shule ambazo zitafanya vizuri katika matokeo ikiwa kama motisha.

Nae Mkuu wa Idara ya Elimu Msingi. Mwl.Miriam Kihiyo amesema kuwa Mafuzo hayo yatadumu kwa siku 6 na yataweza kuwafikia Walimu wakuu wa Shule za Msingi pamoja na Wenyeviti wa  kamati za Shule zote  wakiwawakilisha wazazi wote wa Halmashauri ya Chalinze kwa lengo la kujenga umoja baina yao.

Kwa upande wa Mratibu wa Shule Bora na mafunzo hayo kwa Mkoa wa Pwani Bi. Oliver Kapaya ameeleza kuwa amefurahishwa na ujio wa Mheshimiwa Mwenyekiti wa Halmashauri ya Chalinze ambaye pia ni Diwani wa Kata ya Msoga kwani imeweka chachu katika kufanikisha suala zima la umoja wa Walimu na Wazazi lakini pia kwa jinsi Halmashauri inavyojipanga katika kuhakikisha mpango huo wa kuinua elimu unafanikiwa kwa asilimia mia na kuongeza ufaulu.

Kwaniaba ya Washiriki wa Mafunzo hayo ,Mwenyekiti wa kamati ya shule Shule ya Msingi Mbwewe Ndg. Iddi Aweso amesema kuwa mara nyingi wenyeviti wa kamati a shule huwa ndio vikwazo vikubwa lakini amewahakikishia viongozi hao kuwa watakwenda  kuyafanyia kazi yale yote waliyoyapata ili kuweza kuleta mabadiliko makubwa katika sekta ya Elimu ndani ya Halmashauri ya Chalinze..