Mafunzo ya waandikishaji Daftari la kudumu la mpiga kura yafunguliwa Chalinze

Imewekwa: February 10th, 2025

Na John Mlyambate

 Afisa Mwandikishaji wa Daftari la Kudumu la Wapiga Kura wa Jimbo la Chalinze, Bwana Ramadhani Possi, leo amefungua rasmi mafunzo ya uandikishaji wa wapiga kura kwa waandikishaji wasaidizi ngazi ya kituo na waendesha vifaa vya BVR. Mafunzo hayo yanafanyika katika Ukumbi wa Mikutano wa Shule ya Sekondari ya Lugoba, yakilenga kuwajengea uwezo watendaji wa zoezi la uandikishaji wa wapiga kura.

Mafunzo haya yatachukua siku mbili, kuanzia tarehe 10 hadi 11 Februari 2025, na yanahusisha maelekezo ya kina juu ya taratibu za uandikishaji, matumizi sahihi ya vifaa vya BVR, pamoja na usimamizi wa kanuni na sheria za uchaguzi. Baada ya mafunzo haya, zoezi la uandikishaji wa wapiga kura litaanza rasmi kuanzia tarehe 13 hadi 19 Februari 2025 katika mikoa ya Pwani na Tanga.

Akizungumza wakati wa ufunguzi, Bwana Possi amewataka washiriki wa mafunzo kuwa makini, wasikivu, na waadilifu katika kazi zao ili kuhakikisha uandikishaji unafanyika kwa weledi na kukamilika kwa wakati, kulingana na ratiba iliyotolewa na Tume Huru ya Uchaguzi ya Tanzania. Amesisitiza kuwa jukumu walilopewa ni la kitaifa, hivyo wanapaswa kulitekeleza kwa uwajibikaji mkubwa ili kudumisha haki za wapiga kura.

Aidha, amewakumbusha washiriki kuzingatia viapo vyao walivyokula kabla ya kuanza mafunzo haya. Amewasisitiza kuwa viapo hivyo ni kwa mujibu wa sheria za nchi, zinazomtaka kila mtu anayehusika na majukumu ya kitaifa kutekeleza kazi kwa mujibu wa sheria, taratibu, na kanuni zilizowekwa. Amesema kutii viapo hivyo kutasaidia kulinda uadilifu wa mchakato wa uchaguzi.

Mafunzo haya ni sehemu ya maandalizi muhimu kuelekea zoezi la uandikishaji wa wapiga kura, ambalo ni hatua muhimu katika kuhakikisha kila raia mwenye sifa anapata fursa ya kushiriki katika uchaguzi mkuu ujao. Serikali na wadau wa uchaguzi wanaendelea kutoa elimu kwa umma ili kuhamasisha wananchi kushiriki kikamilifu katika mchakato huu wa kidemokrasia.