Mafunzo ya waandikishaji Daftari la kudumu la wapiga kura yafungwa rasmi

Imewekwa: February 11th, 2025

Na John Mlyambate

Afisa Mwandikishaji wa Jimbo la Chalinze, Bwana Ramadhani Possi, leo amefunga rasmi mafunzo ya waandikishaji wa daftari la kudumu la wapiga kura, yaliyofanyika kwa siku mbili mfululizo. Mafunzo hayo yalilenga kuwaandaa waandikishaji hao kwa ajili ya uboreshaji wa daftari la kudumu la wapiga kura, unaotarajiwa kuanza rasmi Februari 13 hadi 19, 2025, katika Halmashauri ya Wilaya ya Chalinze.

Katika hotuba yake ya kufunga mafunzo hayo, Bwana Possi aliwapongeza washiriki kwa kujitokeza na kushiriki kikamilifu katika mafunzo hayo. Aliwataka kutumia maarifa waliyopata kwa ufanisi ili kuhakikisha zoezi la uboreshaji wa daftari la kudumu la wapiga kura linafanyika kwa weledi na mafanikio makubwa. Aidha, aliwahimiza kuzingatia maelekezo waliyopatiwa ili kuhakikisha kila raia mwenye sifa anapata fursa ya kuandikishwa.

Bwana Possi alisisitiza umuhimu wa utunzaji wa vifaa vya kazi vitakavyotumika katika zoezi hilo, akibainisha kuwa vifaa hivyo ni nyenzo muhimu katika kuhakikisha uboreshaji wa daftari unafanyika kwa ufanisi. Pia aliwataka wananchi kushiriki kikamilifu kwa kuhakikisha wanahakiki taarifa zao na kujiandikisha ili waweze kushiriki katika uchaguzi ujao kwa mujibu wa haki yao ya kikatiba.

Katika kuimarisha huduma kwa wananchi, Afisa Mwandikishaji huyo aliwataka waandikishaji wote kufanya kazi kwa uadilifu, uwazi, na kwa kuzingatia maadili ya kazi zao. Alisisitiza matumizi ya lugha yenye staha na heshima kwa wananchi, akisema kuwa ni muhimu kujenga mazingira rafiki ili wananchi waweze kushiriki kwa uhuru katika zoezi hilo muhimu kwa mustakabali wa demokrasia nchini.

Uboreshaji wa daftari la kudumu la wapiga kura ni hatua muhimu katika maandalizi ya uchaguzi, hivyo ushirikiano kati ya waandikishaji na wananchi unahitajika ili kufanikisha zoezi hilo. Bwana Possi alihitimisha kwa kutoa wito kwa viongozi wa jamii, mashirika yasiyo ya kiserikali, na vyombo vya habari kusaidia katika kutoa elimu kwa wananchi juu ya umuhimu wa kushiriki katika uboreshaji wa daftari la kudumu la wapiga kura.