Mafunzo ya waandikishaji wa Daftari la wapiga kura yafanyika Chalinze

Imewekwa: October 8th, 2024

Msimamizi wa Uchaguzi wa Serikali za Mitaa Halmashauri ya Chalinze ameendesha mafunzo kwa waandikishaji wa Daftari la Wapiga Kura kwa ajili ya Uchaguzi wa Serikali za Mitaa utakaofanyika tarehe 27 Novemba 2024. Mafunzo hayo yamefanyika leo katika Ukumbi wa Mikutano wa Shule ya Sekondari ya Lugoba, yakihusisha waandikishaji 469 kutoka kata 15, vijiji 74, na vitongoji 469.

Kaimu Msimamizi wa Uchaguzi wa Halmashauri ya Chalinze, Archanus Kilaja, amepongeza waandikishaji kwa kuaminiwa na kuteuliwa kutekeleza jukumu hili la kitaifa. Aliwataka kuzingatia uadilifu na uaminifu katika utekelezaji wa majukumu yao, akisisitiza kuwa zoezi hili linatakiwa kukamilika ndani ya siku 10 kuanzia tarehe 11 Oktoba hadi 20 Oktoba 2024.

Pia aliwakumbusha waandikishaji kuzingatia sheria na kanuni za uchaguzi wa serikali za mitaa za mwaka 2024 katika utekelezaji wa kazi zao. Kabla ya kuanza kwa mafunzo, waandikishaji walikula kiapo cha uaminifu.

Afisa Uchaguzi wa Halmashauri ya Chalinze alitoa maelekezo ya kina kuhusu hatua za kuandikisha wapiga kura, ambapo waandikishaji walipokea maelekezo hayo kwa kauli moja na kuahidi kuyatekeleza kwa weledi.