Maji yanakuja Chalinze-Makamu wa Rais

Imewekwa: October 26th, 2018

"Maji yanakuja Chalinze,maji yanakuja Chalinze"kauli hiyo imetolewa jana na Makamu wa Rais wa Jamhuri ya Muungano wa Tanzania Mheshimiwa Samia Suluhu Hassan alipokuwa akizungumza na wananchi wa halmashauri ya wilaya ya Chalinze katika mkutano wa hadhara uliofanyika katika uwanja wa polisi.

Katika hotuba yake Mama Suluhu alisema baada ya dhiki ni faraja,kwa kuwahakikishia wananchi wa Chalinze upatikanaji wa maji ndani ya muda mfupi. "Tukisema tunatekeleza na ikitokea hatujatekeleza tunatoa sababu za kutotekeleza" Suluhu alisema. Aliendelea kufafanua Makamu wa Rais kwa kusema tulikusudia,tumedhamiria maji yatapatikana Chalinze.

Aliyasema hayo Makamu wa Rais kwa kumwondolea mashaka mbunge wa Jimbo la Chalinze Mheshimiwa Ridhiwani Kikwete baada ya kuonyesha mashaka na wasiwasi juu ya utekelezaji wa mradi huo alipopata nafasi ya kueleza mafanikio ya serikali ya awamu ya tano katika utekelezaji wa Ilani ya Chama cha Mapinduzi wilayani humo,Ridhiwani alieleza ukosefu wa maji jimboni Chalinze kama changamoto ya kudumu ambayo haijapata ufumbuzi.

Kwa upande wake Mhandisi Luhemeja ambaye ni Mtendaji Mkuu wa DAWASA Alitoa ahadi kwa wananchi wa Chalinze mbele ya Makamu wa Rais kupatikana kwa maji Chalinze Mara ifikapo tarehe 31/12/2018,na kueleza mpango mkakati wa DAWASA kwa undani na hatua za utekelezaji.

Naye Mkuu wa mkoa wa Pwani Mhandisi Evarist Ndikilo,baada ya kuwa amepokea  mkakati wa usambazaji maji kwa mji wa Chalinze na kijiji cha Mboga,aliwahakikishia wananchi wa Chalinze maji yatapatikana na tumwache Mtendaji Mkuu wa DAWASA afanye kazi na kumwomba mbunge wa jimbo la Chalinze avute subira maji yanakuja Chalinze. "Mimi kwa Taaluma Yangu kama Mhandisi nimeupitia hatua kwa hatua mpango mkakati wa DAWASA na kujiridhisha maji yanakuja Chalinze." Ndikilo alisema.