Mapato ya ndani kuimarisha huduma za maji vijijini

Imewekwa: March 30th, 2018

Halmashauri ya wilaya ya Chalinze imeamua kumaliza kero ya maji kwa wananchi wa kijiji cha Magulumatali kata ya Talawanda kwa kuchimba bwawa la maji lenye uwezo wa kuhudumia wananchi zaidi ya 12,000,Mradi huu unatekelezwa kwa kutumia mapato ya ndani ya halmashauri, kama lilivyo agizo la serikali la kupeleka asilimia 60 ya mapato ya ndani yafanye kazi ya kuimarisha miundo mbinu ya maendeleo katika ngazi za vijiji na kata.

Kwa mujibu wa Diwani wa kata hiyo ambaye pia ni mwenyekiti wa halmashauri ya Chalinze Mhe:Saidi Zikatimu alieleza kuwa utekelezaji wa mradi huu ni mipango mizuri ya halmashauri katika kutekeleza Ilani ya Chama Cha Mapinduzi kuhusu utoaji wa huduma mbalimbali za jamii kama upatikanaji wa maji vijijini,na kueleza thamani ya mradi huo ni zaidi ya milioni 29.

Aliishukuru Halmashauri yake kwa kuwa na mipango inayotekelezeka kwa wakati na kuondoa kero kwa wananchi na kuwashukuru watendaji wa halmashauri kwa kutekeleza mipango kwa vitendo kama inavyokuwa imepangwa katika vikao mbalimbali vya maamuzi.

Aidha Zikatimu alifafanua kuhusu ujenzi wa bwawa hilo kuwa lilijengwa mwaka 1995 wakati huo Mbunge wa Jimbo la Chalinze akiwa Rais Mstaafu Mhe:Jakaya Mrisho Kikwete likiwa na uwezo wa kuhudumia watu wasiozidi 2000,wakati huo kijiji hiki cha Magulumatali kikiwa kitongoji ndani ya kijiji cha Talawanda.Hivyo kwa sasa bwawa hili haliwezi kukidhi mahitaji ya wananchi wa Magulumatali kwani idadi ya wakazi imeongezeka.

Kwa upande wake mwenyekiti wa serikali ya kijiji Bwana Ramadhani Biga kwa niaba ya wananchi wa Magulumatali aliishukuru serikali kwa jitihada zake katika kutatua kero za wananchi na kuongezea kuwa ujenzi wa bwawa hili ni utekelezaji wa kipaumbele cha wananchi wake kwani walihitaji huduma hii kwa muda mrefu sana.”Naomba serikali itutatulie kero ya barabara ya kutoka Lugoba kuja Magulumatali ili kurahisisha namna ya kusafirisha mazao tunayolima”.Biga alisema.

Naye Bwana Ali Mavula mkazi wa kijiji cha Magulumatali alieleza yake ya moyoni kwa kuupongeza uongozi wa halmashauri kwa kuwajengea bwawa na kuiomba serikali ifungue zahanati ya kijiji ili ianze kutoa huduma kwani majengo yamekamilika.”Tunaomba serikali ituletee watumishi wa afya ili tuweze kupata huduma mahali hapa”Mavula alisema.

Ujenzi wa bwawa la maji katika kijiji cha Magulumatali ukiendelea ili kuondoa kero ya maji kwa wananchi