MATHEOSTECHS Yafunga Umeme wa Jua Shule ya Sekondari Jakaya Mrisho Kikwete Chalinze

Imewekwa: February 23rd, 2024

Kampuni binafsi ya MATHEOSTECHS inayojishughulisha na ufungaji wa Umeme wa jua,uwekaji wa tovuti na wauzaji wa Vifaa mbalimbali vya Kielektroniki leo hii imefunga Umeme unaotumia nguvu za jua katika Shule ya Sekondari ya Jakaya Mrisho Kikwete iliyoko katika Kitongoji cha Msolwa katika kata ya Bwilingu,Mamlaka ya Mji Mdogo wa Chalinze. Kampuni hiyo imetoa msaada huo wa kufunga Umeme huo ili kuondoa kero ya ukosefu wa Umeme katika shule hiyo mpya iliyojengwa hivi karibuni kwa fedha za Serikali kuu.

Mkurugenzi wa Kampuni hiyo Bwana Theobald Boniventure,ameamua kufunga Umeme huo katika Shule ya Jakaya Mrisho Kikwete ili kuunga mkono Juhudi za Serikali ya awamu ya sita chini ya Dkt Samia Suluhu Hassan za kuboresha mazingira ya kufundishia na kujifunzia. Umeme ulifungwa katika Shule hiyo umegharimu zaidi ya fedha za kitanzania Milioni 16 ili kuwawezesha watoto wa kitanzania kusoma kwa bidii usiku na mchana ili kufikia malengo yanayotakiwa kwa mujibu wa sera ya Elimu nchini Tanzania 

Shughuli ya uzinduzi wa huduma hiyo imefanywa na Mbunge wa Jimbo la Chalinze na Naibu Waziri wa Nchi Ofisi ya Rais Menejimenti ya Utumishi wa Umma na Utawala Bora,Mheshimiwa Ridhiwani Kikwete. Mheshimiwa Kikwete amezindua kwa kukata utepe kama ishara ya kurasimisha matumizi ya Umeme huo katika shule hiyo na kuishukuru Kampuni hiyo kwa niaba ya Serikali na wananchi wa Halmashauri ya Chalinze.

“Binafsi niishukuru kampuni ya MATHEOSTECHS Kwa uzalendo Mkuu na upendo wa hali ya juu,kwa kutambua uhitaji wa shule hii na kutoa msaada stahiki ili kuwawezesha wanafunzi wa shule hii zaidi ya 200 kuweza kusoma muda wowote pasipo shaka.” Mheshimiwa Ridhiwani alisema.

Naye Mkurugenzi wa Halmashauri ya Chalinze Bwana Ramadhani Possi ameishukuru Kampuni ya MATHEOSTECHS kwa kazi waliyoifanya na kuahidi Ushirikiano mkubwa na Kampuni hiyo katika utatuzi wa changamoto mbalimbali zinazoikabili Halmashauri ya Chalinze.

Mkuu Divisheni ya Sekondari wa Halmashauri ya Chalinze Bi Salama Ndyetabura ameipongeza Kampuni ya MATHEOSTECHS kwa kuweka mazingira chanya ya kufundishia na kujifunzia yanayowamotisha wanafunzi kufikia malengo takiwa katika Elimu. Ndyetabura aliendelea kwa kuwasihi wanafunzi kuitumia fursa ya Uwepo wa Umeme wa jua kujisomea kwa bidii na kufanya vema katika mtihani wa Taifa.

Kwa upande Wake Mkuu wa Shule ya Jakaya Mrisho Kikwete Mwalimu Benedikto Mwakilema akitoa taarifa ya Maendeleo ya Shule hiyo allishukuru Kampuni ya MATHEOSTECHS kwa huduma nzuri ya mwanga wa Umeme na kuiomba Serikali kukamilisha baadhi ya miundombinu ambayo haijakamilika shuleni hapo sanjari na ukamilishaji wa maabara za Sayansi,mabweni ya wanafunzi na nyumba za walimu.