Mhe. Ridhiwani Kikwete apokea Vifaa tiba kutoka Taasisi ya LIONS CLUB

Imewekwa: September 30th, 2022

Mhe. Ridhiwani Kikwete apokea Vifaa tiba kutoka taasisi ya LIONS CLUB.

Naibu Waziri wa Ardhi ,Nyumba na Maendeleo ya Makazi ambaye pia ni Mbunge wa jimbo la Chalinze Mhe.Ridhiwani Kikwete leo tarehe 29/09/2022 amepokea msaada wa vifaa tiba  kutoka taasisi ya LIONS CLUB INTERNATIONAL Mhe.Ridhiwani amevikabidhi  vifaa hivyo katika zahanati ya Ruvu darajani mbele ya Mwenyekiti na Mkurugenzi wa Halmashauri ya Wilaya ya Chalinze ili viweze kusaidia utoaji wa huduma za afya kwa wananchi na wakazi wa kata ya Vigwaza na vijiji jirani.

Akizungumza mara baada ya kupokea vifaa hivyo Mhe.Ridhiwani amewashukuru taasisi ya LIONS CLUB kwa msaada walioutoa na kwa kutekeleza Sera ya Mheshimwa Rais wa Jamhuri ya Muungano wa Tanzania ya kuimarisha mahusiano.

“Kipekee kabisa nimefarijika sana kupokea vifaa hivi vya afya kutoka taasisi ya LIONS CLUB kwani mmekuwa wepesi sana kusikia kilio cha wana Ruvu darajani na hii ni kiashiria kwamba taasisi hii inatekeleza sera ya Mheshimiwa Rais wa Jamhuri ya Muungano wa Tanzania ya kuimarisha mahusiano na muunganiko baina ya Serikali kuu na taasisi binafsi”.Amesema Mhe.Ridhiwani.

Hata hivyo Mheshimiwa Naibu Waziri ameendelea kuhimiza Halmashauri zote nchini ziweke utamaduni wa kutenga sehemu ya ardhi kwaajili ya miradi mbalimbali ikiwemo miradi ya ujenzi wa huduma za afya kwani ndio suala muhimu na la msingi kwa wananchi.

Naye Mwenyekiti wa Halmashauri ya Wilaya ya Chalinze Mhe.Hassan Rajabu Mwinyikondo amewashukuru wageni hao kwa msaada huo wa vifaa vya pamoja na kuwakaribisha kutumia fursa zilizopo chalinze hasa katika kununua ardhi iliyopo katika mipango miji katika mradi wa viwanja Msolwa.

“Niwashukuru sana taasisi hii kwa vifaa hivi mlivyotupatia na hata hivyo niwakaribishe sana Chalinze kwani kuna fursa nyingi za kuwekeza hivyo basi sisi kama Halmashauri tuna viwanja vingi na vyakutosha vya biabashara kwa bei nafuu”.Amesema Mhe.Mwinyikondo

Pamoja na hilo Mhe. Mwinyikondo amewaomba LIONS CLUB kuwa sehemu ya Halmashauri ya Wilaya ya Chalinze 

Aidha  Mwenyekiti mstaafu wa LIONS CLUB  Ndg Muntadhir Baruan amesema kuwa si vifaa hivi tu vya afya vilivyotolewa siku ya leo bali watahakikisha wananchi wanapata huduma nyingine hususani kwenye sekta ya maji.

“Tulipokea maombi ya uhitaji wa vifaa vya huduma za afya katika Zahanati ya Ruvu Darajani na leo tunashukuru tumevikabidhi  lakini pia tunajua matatizo yako mengi hivyo basi sisi kama taasisi tutahakikisha tunaifikia jamii hasa katika masuala ya afya pamoja na maji”Amesema Ndg.Baruan.

Aidha Diwani wa kata ya vigwaza Mhe.Mussa Gama amezungumza kwaniaba ya wakazi na wananchi wa Ruvu darajani ambapo ametoa shukrani za dhati kwa taasisi ya LIONS CLUB kwa msaada huo kwani utasaidia utoaji wa huduma za afya katika kata hiyo.

“Napenda kutoa shukrani zangu za dhati kwa taasisi hii kwani msaada huu utapunguza changamoto za utoaji wa huduma za afya hasa kwa kina mama wajawazito katika zahanati yetu ya Ruvu darajani na ninaamini kupatikana kwa vifaa hivi huduma za kujifungua zitaendelea kuwa bora zaidi”.Amesea Mhe.Gama.

Vifaa tiba hivyo ni pamoja na vitanda 3, vitanda vya uchunguzi 2 ,magodoro 4 pamoja na hadubini 1 na hivi vyote vimegharimu kiasi cha shilingi milioni 5.