Mhe.Ridhiwani Kikwete Hajaridhishwa na wawekezaji wasioendeleza maeneo yao.

Imewekwa: February 25th, 2023

Naibu Waziri wa Ardhi Nyumba na Maendeleo ya Makazi Mhe.Ridhiwani Kikwete hajaridhishwa na wawekezaji ambao wanamiliki maeneo makubwa na wameshindwa kuyaendeleza.

Mhe.Kikwete hajaridhishwa na tabia hiyo na kufikia hatua ya kuzitaka Serikali za Vijiji kuorodhesha majina ya wawekezaji ambao wanakaa na ardhi bila kuiendeleza ili irudishwe kwa ajili ya matumizi mengine.

Aliyasema hayo alipokuwa kwenye ziara katika Kata ya Lugoba Halmashauri ya Chalinze kuzungumza na wananchi kutatua kero na changamoto za wakazi wa jimbo hilo ambalo yeye ni Mbunge

Mhe.Ridhiwani alisema kuwa maeneo mengi aliyopita kikiwemo Kijiji cha Makombe  kumekuwa na malalamiko mengi toka kwa wananchi juu ya baadhi ya maeneo yaliyoombwa na wawekezaji hayajaendelezwa na kuwa mapori.

"Vijiji na Vitongoji orodhesheni majina ya wawekezaji wote walio katika maeneo yenu ambao hawajaendeleza ardhi waliyoiomba kufanya uwekezaji lakini wameiacha bila kuiendeleza kwani huo siyo utaratibu ni vema wakanyanganywa na kupewa watu wengine ili kuyatumia kuleta maendeleo,"alisema Mh.Ridhiwani.

Alisema kama kuna maeneo mnaona yametelekezwa na wawekezaji wasipate shida wanachotakiwa viongozi kupitia mikutano mikuu ni kutoa hoja na kuandikwa muhutasari kisha upelekwe Halmashauri na kupelekwa Wizarani ili kubadilishwa matumizi na kurudishwa Kijijini na kupangiwa shughuli nyingine.

"Tena kuna baadhi ya wawekezaji wanapokwenda kuomba maeneo wanatoa ahadi nyingi kuwa wakipewa watasaidia huduma za jamii au kutoa ajira kwa Vijana wa eneo husika lakini hawafanyi hivyo ni vema wakaachia ardhi waliyopewa,"alisema Mhe.Ridhiwani.

Naye Diwani wa Kata ya Lugoba Mhe.Rehema Mwene ametoa shukrani za dhati kwa uamuzi huo wa Mheshimiwa Ridhiwani Kikwete  wa kuja kuzungumza na wananchi na na kuamini kero zao zitatatuliwa

Mhe.Mwene alishukuru uamuzi wa Mhe.Ridhiwani kwa wawekezaji ambao wanachukua maeneo na kutoyaendeleza na kuyafanya maeneo hayo kuwa mapori hali inayosababisha hatari kwa wananchi.

Ziara katika Kata hiyo ni muendelezo wa Ziara ya Mbunge wa jimbo la Chalinze Mhe.Ridhiwani ya kusikiliza na kutatua kero za wananchi moja kwa moja.