Mheshimiwa Kikwete ahamasisha zoezi la sensa kata kwa kata Chalinze

Imewekwa: August 22nd, 2022

Naibu Waziri wa Ardhi,nyumba na Maendeleo ya Makazi(Mb),Mheshimiwa Ridhiwani Kikwete ameendelea na Kazi ya kufanya Mikutano ya Kuhamasisha wananchi kujitokeza katika zoezi la Sensa ya watu na makazi katika Jimbo la Chalinze katika kata za Lugoba na Miono.

Mheshimiwa Kikwete katika hotuba zake za uhamasishaji amewataka wananchi kujitokeza kwa kuwa tayari kuhesabiwa tarehe 23 Agosti 2022 siku ya Jumanne kwa kutoa ushirikiano wa Hali na Mali kwa Makarani wa Sensa kwa kutoa taarifa sahihi ili kuiwezesha serikali kuweza kupanga mipango sahihi ya Maendeleo kwa ajili ya wananchi.

      “ Ndugu zangu niwaombe tujitokeze kwa wingi katika zoezi hili pasipo kusita ili kuiwezesha Serikali kutupatia huduma sitahiki kulingana na taarifa tutakazo zitoa,Serikali yetu itajenga miundombinu ya afya,elimu,barabara na maji kwa kutegemea idadi yetu na wingi endapo tutatoa taarifa sahihi.” Mheshimiwa Ridhiwani alisema.

Naibu Waziri wa Ardhi aliendelea kuwakumbusha wananchi wa kata za Miono na Lugoba kuwa Sensa hii inajumuisha watu pasipo ubaguzi wa aina yoyote,hivyo aliwataka wananchi kutoa taarifa sahihi za watu wasijiweza kama walemavu waliopo katika maeneo na makazi tunayoishi kwani wanasitahili kuhesabiwa na kuweza kupangiwa mipango sahihi ya maendeleo kulingana na idadi yao sanjari na kuwekewa mazingira rafiki kulingana na hali zao.

        “Wanachalinze tusiwafiche walemavu katika zoezi hili tuweke mazingira ya watu hawa kuhesabiwa ili nao waweze kujulikana kwa idadi yao ili Serikali iweze kuwapangia mipango thabiti kulingana na idadi na mahitaji yao katika nyanja mbalimbali za maisha.” Kiwete alisisitiza.