Mheshimiwa Mwinyikondo Mfano wa kuigwa Chalinze

Imewekwa: August 20th, 2024

Mwenyekiti wa Halmashauri ya Wilaya ya Chalinze na Diwani wa Msoga,Mheshimiwa Hassani Mwinyikondo ametekeleza kwa vitendo maelekezo ya Serikali kwa wanafunzi wa shule za Msingi na Sekondari kuhakikisha kuwa wanapata Chakula cha mchana shuleni.

Mwinyikondo ametekeleza maelekezo hayo jana alipogawa vyakula mbalimbali katika Shule za Msingi tano na Sekondari moja,shughuli hiyo ilifanyika katika Ofisi ya kata ya Msoga na kuhudhuriwa na viongozi mbalimbali wa kata hiyo na walimu wa Shule zilipokea msaada wa vyakula hivyo.

Mheshimiwa Diwani aligawa viroba kadhaa vya mihogo,unga wa sembe,mchele na matenga kadhaa ya nyanya ili wanafunzi waweze kupata lishe mashuleni na kuinua ufaulu wa wanafunzi hao katika mitihani yao.

Kwa upande wake Afisa Elimu Awali na Msingi,Bi Miriam Kihiyo alitoa shukrani za dhati kwa Mheshimiwa Mwinyikondo kwa kujali na kuthamini jitihada za Serikali katika kuboresha na kuimarisha ufaulu wa wanafunzi katika Halmashauri ya Chalinze na kutoa wito kwa wadau wengine kuunga mkono jitihada za Serikali kuhakikisha wanafunzi wote wanapata chakula shuleni.