Miaka 59 ya Uhuru Kuadhimishwa kwa Michezo Chalinze

Imewekwa: December 13th, 2020

Halmashauri ya Wilaya ya Chalinze imeadhimisha miaka 59 ya Uhuru Tanzania siku ya Tarehe 9/12/2020 kwa kuandaa bonanza maalum la Michezo mbalimbali na pia ikiwa ni maadhimisho ya Siku ya Ukimwi Duniani.

Bonanza hilo limefanyika  katika viwanja vya Lugoba Sekondari ambapo michezo mbalimbali ilichezwa.

Mratibu mkuu wa bonanza hilo ambaye pia ndiye Afisa utamaduni wa Halmashauri ya Wilaya ya Chalinze Bi Ester Kalale amesema amefurahishwa na ushiriki uliooneshwa na watumishi katika kudumisha michezo.

“Kwaniaba ya Mkurugenzi Mtendaji Halmashauri ya Wilaya ya Chalinze na watumishi tunamshukuru Mungu kwa kufanikiwa kumaliza Bonanza salama na pongezi tunazielekeza kwenu kwa  kushiriki katika bonanza hili la michezo kwani inasaidia kujenga undugu na mahusiano mema katika kazi hivyo basi tuendeleze Michezo”. Alsema Bi. Ester Kalale.

Sanjari na hilo pia kulikuwa na zoezi ka upimaji wa Afya kwa hiari pamoja na ushauri wa kiafya ambapo Bi Flora Barakana aliyemuakilisha mganga mkuu wa Wilaya Ndg. Allen Mlekwa ameiasa jamii kuwa na utamaduni wa kupima afya zao mara kwa mara.

“ Ninaisihi Jamii na watumishi wote kuwa na utamaduni wa kupima afya zao mara kwa mara na pia kufanya mazoezi kwani kunasaidia kupunguza magonjwa mbalimbali mwilini, na pia hongereni sana Kwa wale wote waliojitokeza kupima afya zao na wote waliokuja kupata ushauri wa kiafya juu ya kujikinga na magonjwa mabalimbali ”. Alisema Bi: Flora Barakana.

Maadhimisho ya siku ya Uhuru wa Tanzania huadhimishwa Kila ifikapo tarehe 9 mwezi Disemba kila mwaka ikiwa ni tarehe na Mwezi ambao Taifa la Tanganyika kabla ya kuitwa Taifa la Tanzania kupata Uhuru wake mwaka 1961.