Milioni 140 Kuneemesha Wanawake na Vijana Chalinze

Imewekwa: June 14th, 2018

Halmashauri ya Wilaya ya Chalinze yatoa mikopo ya fedha za kitanzania milioni 140 kwa vikundi vya vijana na wanawake 39 vilivyokidhi vigezo kutokana na mapato ya ndani ya halmashauri ambayo ni asilimia 10 ya mapato hayo.Zoezi la kukabidhi hundi kwa wajasiriamali hao limefanywa jana na Katibu Tawala wa wilaya ya Bagamoyo kwa niaba ya Mkuu wa wilaya hiyo Bi Erica Yegela katika kijiji cha Msata.

Kwa mujibu wa Afisa Maendeleo ya Jamii wa Wilaya Bwana Saidi Mwakapugi,amesema mkopo huu kwa vikundi vya vijana na wanawake ni utekelezaji wa Ilani ya Chama Cha Mapinduzi lakini pia ni mpango wa halmashauri kwa bajeti ya mwaka 2017/2018 ambayo halmashauri ilipanga kutoa mikopo kwa  wanawake na vijana jumla ya fedha za kitanzania milioni 300,mpaka sasa halmashauri imekwisha kopesha jumla ya fedha za kitanzania milioni 260.

Mwakapugi aliendelea kufafanua,kwa robo ya tatu halmashauri inatarajia kutoa mkopo wa  fedha za kitanzania milioni 169,hivyo kuvuka lengo kwa mwaka wa fedha 2017/2018.Utoaji mikopo kwa wanawake na vijana ni matokeo mazuri ya namna halmashauri inavyokusanya mapato na kuwa na nidhamu ya matumizi ya fedha hizo kwa mujibu wa bajeti na miongozo ya serikali.

Afisa Maendeleo ya Vijana Bi Wahda Mwishehe     katika taarifa yake kwa mgeni rasmi alisema,vikundi vya vijana na wanawake vinapopata mikopo hii hujishughulisha na shughuli mbalimbali za ujasiriamali kama utengenezaji wa mikeka,vikapu,machanuo,miko,mikoba ,shanga,utengenezaji wa sabuni na batiki na biashara ndogondogo, hivyo kurejesha mikopo kwa wakati na wadau wengine kukopeshwa.

Kwa upande wake mwenyekiti wa halmashauri ya wilaya ya Chalinze Mheshimiwa Said Zikatimu aliwaasa wanawake na vijana kujiunga katika vikundi ili kukidhi vigezo vya kuweza kukopesheka na kuwataka waitumie mikopo hiyo katika kujikwamua na umasikini wa kipato.Aidha Zikatimu alieleza mafanikio yaliyofanywa na halmashauri yake kuwa ni pamoja kuviwezesha vikundi vya wanawake na vijana kwa asilimia 100,kupeleka asilimia 60 ya mapato ya ndani katika miradi ya maendeleo katika sekta za Maji,Elimu,Afya,Barabara na Utawala.

Halmashauri kwa uwepo wake wa miaka miwili imeweza kununua magari matatu mapya kutokana na mapato ya ndani na kwa mwaka huu wa fedha tunatarajia kununua matrekta 6 katika kuboresha sekta ya kilimo hapa wilayani,lakini pia tumeweza kununua pikipiki 15 kwa ajili ya maafisa watendaji na maafisa ugani. Zikatimu alieleza.

Mgeni rasmi katika hafla hiyo Bi Erica Yegela katika hotuba yake aliishukuru halmashauri ya wilaya ya Chalinze kwa kutekeleza kwa vitendo Ilani ya Uchaguzi kwa kutoa huduma kwa wananchi kwa kuzingatia mipango na bajeti kwa mwaka husika.

Aidha Yegela aliwaasa wanawake na vijana kuitumia vizuri mikopo wanayopata kwa kuzalisha kwa tija na hatimaye kuondokana na umasikini wa kipato na akasisitiza waendelee kuwa waaminifu kwa kurejesha mikopo kwa wakati ili vikundi vingine pia viweze kupatiwa.

Katibu Tawala katika hotuba yake ya kukabidhi hundi kwa wajasiriamali hao aliwataka wananchi kwa ujumla kupambana na vitendo vya rushwa,kujiepusha na vitendo vinavyoweza kusababisha maambukizi mapya ya virusi vya UKIMWI,na kutoa taarifa kwenye vyombo vya ulinzi na usalama mara wanapoona kuna dalili ya uvunjifu wa amani katika maeneowanayoishi.

Wanawake na Vijana wa Halmashauri ya Wilaya ya Chalinze wakisubiri kukabidhiwa hundi na Mgeni Rasmi,Katibu Tawala wa Wilaya,Bi Erica Yegela