Milioni 350 kununua vifaa tiba kwa Zahanati 11 Chalinze

Imewekwa: February 17th, 2023

Halmashauri ya wilaya ya Chalinze Mkoani Pwani kwa mwaka huu wa fedha 2022/2023 imepokea jumla ya fedha za kitanzania milioni 350 kwa ajili ya vifaa tiba katika zahanati 11 mpya zilizofunguliwa rasmi mwaka 2022 katika halmashauri ya Chalinze.

Vifaa tiba hivyo kwa zahanati hizo kumi na moja vimekabidhiwa na Naibu Waziri wa Ardhi,Nyumba na Maendeleo ya Makazi,ambaye pia ni Mbunge wa Jimbo la Chalinze,Mheshimiwa Ridhiwani Kikwete kwa waheshimiwa madiwani wa zahanati husika.

Zahanati mpya zilizopokea vifaa tiba hivyo ni Chahua,Kibaoni,Msigi,Pingo,Diozile,Kihangaiko,Mwetemo,Ubenazomozi,Mdaula,Kilemera na Mnindi. Hali kadhalika Serikali imenunua vifaa tiba kwa ajili ya vituo vya afya Msata na Kibindu ili kuviwezesha kutoa huduma za upasuaji.

Mheshimiwa Ridhiwani Kikwete katika hotuba yake ya kukabidhi vifaa tiba hivyo kwa Zahanati hizo mpya alimshukuru Serikali ya Dkt Samia Suluhu Hassan kwa juhudi za makusudi inazozichukua katika kuboresha na kuimarisha sekta ya afya katika Halmashauri ya Chalinze.

“Nitumie fursa hii kumshukuru Mheshimiwa Rais kwa namna anavyotujali wanachalinze katika kuboresha miundombinu ya afya kuanzia zahanati zetu,vituo vya afya,hospitali ya wilaya na jengo la huduma za matibabu ya dharura Nani kama Dkt Samia Suluhu Hassan?” Ridhiwani alisema.

Naibu Waziri aliendelea kuwaasa Watumishi wa afya kuvitunza vifaa tiba hivyo ili vidumu na kutumika kwa muda mrefu. Kwani wakivitunza navyo vitawatunza wananchi kwa matibabu ya uhakika pasipo kuifuata huduma nje ya Chalinze.

Naye  Mwenyekiti wa Halmashauri ya Chalinze,Mheshimiwa Hassani Mwinyikondo kwa niaba ya Baraza la Madiwani alimpongeza Mheshimiwa Mbunge wa Jimbo la Chalinze kwa juhudi anazozifanya kuisemea Halmashauri ya Chalinze na hata miradi mingi yenye tija inapatikana kwa wanachalinze na akamalizia kwa kumshukuru Dkt Samia Suluhu Hassan kwa kuiona na kuipatia miradi mizuri na yenye tija katika sekta mbalimbali.