Milioni 400 Kuondoa Matatizo ya Afya Kibindu

Imewekwa: September 27th, 2018

Mkurugenzi mtendaji wa Halmashauri ya wilaya ya Chalinze Bi Amina Kiwanuka amewataka wananchi wa kata ya Kibindu kuunga mkono juhudi za serikali kwa kujitoa kwa dhati katika ujenzi wa miundombinu ya afya unaoendelea katika zahanati ya Kibindu, kutokana na Fedha iliyitolewa na serikali kuu kiasi cha Fedha za kitanzania Milioni 400 kwa ajili ya kuongezea miundombinu ya afya katika vituo vya afya na Zahanati nchini kote

Mkurugenzi Kiwanuka ameyasema hayo leo alipokuwa akisimamia ujenzi wa miundombinu ya afya akiwa na wananchi wa Kibindu."Nawaagiza watendaji wa vijiji na kata hamasisheni wananchi waweze kushiriki katika ujenzi wa miundombinu ya afya ili kuunga mkono juhudi za serikali ya awamu ya tano katika kuondokana na kero ya wananchi kukosa huduma za afya,tujitahidi kwa nguvu zote ili ifikapo Oktiba 30 majengo haya yawe tayari nimejaza mkataba mbele ya Mkuu wa Mkoa kumthibitishia hivyo wananchi tuchape kazi inawezekana." Kiwanuka alisema

Aliongezea kwa kuwasisitiza mafundi wanaojenga majengo hayo kufanya kazi kwa bidii ili kumaliza kwa wakati na kunapokuwa na changamoto yoyote ile wawasiliane naye moja kwa moja ili ujenzi usisimame kwa vikwazo vinavyoweza kutatuliwa ili kwenda na wakati na hatimaye wananchi wapate huduma za afya kwa wakati.

Kwa upande wake Diwani wa kata ya Kibindu Mheshimiwa Ramadhani Mkufya akizungumza kwa niaba ya wananchi ameishukuru serikali ya awamu ya tano kwa kitendo cha kuanza ujenzi Wa miundombinu ya afya katika kijiji cha Kibindu. "Ujenzi wa miundombinu hii ni wazi serikali ya awamu ya tano inatekeleza ilani ya Uchaguzi kwa vitendo na kituo hiki kitaondoa kero kwa wananchi kwani watapata huduma bora za afya na kunusuru afya ya mama na mtoto katika kata hii ya Kibindu."Mkufya alisema.

Mkufya aliongezea kwa kuahidi kufanya kazi hii kwa ushirikiano wa hali ya juu ili kukamilisha na wananchi wana mwitikio chanya katika kazi hii kwani huduma hii wameisubiri kwa muda mrefu sasa.