Miradi yenye Thamani ya Bilioni 60 yatekelezwa ndani ya siku 365 za Rais Samia

Imewekwa: March 17th, 2022

CHAMA Cha Mapinduzi (CCM) Wilaya ya Bagamoyo kimempongeza Rais Samia Suluhu Hassani kwa kuidhinisha zaidi za bilion 60 kwa ajili ya kutekeleza miradi mbali mbali ya Maendeleo  katika Halmashauri ya  Chalinze.

Shukrani hizo zimetolewa jana mjini Chalinze na Mwenyekiti wa CCM wilaya ya Bagamoyo Abdul Sharifu baada ya ziara ya siku moja ya Kamati ya Siasa ya Chama hicho kukagua miradi ambayo imetekelezwa katika kipindi cha mwaka mmoja wa Rais Samia Suluhu Hassan.

Mwenyekiti huyo alisema miradi iliyotekelezwa katika Halmashauri hiyo imeonyesha thamani ya fedha zilizotolewa  na hivyo kutatua vikwazo zilivyokuwa vinawakabili wananchi.

Sharifu aliipongeza Halmashauri ya Chalinze kwa kutekeleza miradi ambayo kati ya hiyo ipo ambayo ni vyanzo vya mapato ya ndani ambavyo vitasababisha kupata fedha za kutatua vikwazo kwa wananchi na kuendelea kuleta maendeleo.

" Tunamuombea Rais wetu maisha marefu aendelee kutuletea maendeleo, kipindi cha mwaka mmoja tu hapa chalinze zaidi ya Bilion 60 zimeletwa kutekeleza miradi,  tunampongeza pia Mkurugenzi wetu kazi yake inaonekana thamani ya miradi imeonekana" alisema Sharifu.

Akizungumza katika ziara hiyo Mkurugenzi wa Halmashauri ya Chalinze Ramadhani Posi alisema katika kipindi cha mwaka mmoja wa Rais Samia Suluhu Hassan vyumba vya madarasa kwa shule za sekondari na shikizi vimejengwa na kuondoa mlundikano wa wanafunzi huku wengine wakisogezewa huduma ya elimu karibu.

Aidha Posi alisema soko la Chalinze, stendi ya mabasi ni moja ya vyanzo vya mapato ambavyo vimekamiliki na vita ambavyo vitachangia kukuza mapato ya Halmashauri.

Alisema stendi ya mabasi  ambayo imeanza kufanya kazi Januari mosi mwaka huu mabasi 500 hadi 600 yanaingia kwa siku lakini pia wapo wajasiriamali wadogo 600 hadi 700 wanaofanya shughuli zao katika stendi hiyo ambao nao wanachangia mapato kwa kulipa ushuru.

Kamati hiyo ya siasa ilitembelea mradi wa soko, vyumba vya madarasa katika shule ya sekondari kiwangwa, wodi ya wazazi  hospitali ya Msoga, stendi ya mabasi pamoja na mradi wa maji Mlandizi Mboga ambao unaelezwa kuwa suluhisho la ukosefu wa maji katika mji wa Chalinze, vigwaza na maeneo ya Ruvu.