Miradi yenye Thamani ya Milioni 132 yakaguliwa Kibindu

Imewekwa: August 14th, 2018

Kamati ya Elimu,Afya na Maji ya Halmashauri ya Wilaya ya Chalinze imefanya ziara ya ukaguzi wa miradi ya maendeleo katika sekta za Afya na Elimu katika kijiji cha Kibindu kata ya Kibindu hivi karibuni,ziara hiyo ni ziara ya kukamilisha robo ya nne ya mwaka wa fedha 2017/2018.

Kamati hiyo ikiongozwa na Mwenyekiti Mheshimiwa Malota Hussein ilipitia na kukagua ujenzi wa vyumba vya madarasa vinne vinavyojengwa kwa ufadhili wa shirika la hifadhi ya Taifa TANAPA na ujenzi wa madarasa mawili na ofisi vinavyojengwa na halmashauri kwa kushirikiana na Benki ya NMB,miradi hii yote iliyopitiwa na kamati ilikuwa na thamani ya fedha za kitanzania milioni 132.

Kamati pia ilikagua na kuona eneo la zahanati ya Kibindu ambalo litaanza kujengwa kwa kuongezewa miundombinu ya afya ambayo ni maabara,Jengo la upasuaji na Jengo la Mama na Mtoto.Miundombinu itaanza kujengwa hivi karibuni kutokana na fedha iliyotolewa na serikali kuu jumla ya fedha za kitanzania milioni 400.

Mwenyekiti wa Kamati Mheshimiwa Malota alitoa ushauri kwa wataalamu na wasimamizi wa ujenzi wa madarasa yanayoendelea kujengwa kuzingatia ubora na ubora huo uendane na thamani ya fedha inayotumika yaani “Value for Money.”

Naye Mwenyekiti wa kamati ya shule ya Msingi Kibindu Bi Halma Mazige alipokuwa akizungumza mbele ya wajumbe wa kamati ya Elimu,Afya na Maji alieleza changamoto zinazoikabili shule yake ikiwa ni pamoja na upungufu wa walimu 25,vyumba vya madarasa 25.”Kutokana na wingi wa wanafunzi katika shule hii naiomba halmashauri iweze kusaidia katika ukamilishaji wa miundombinu ya kujifunzia na kufundishia ili elimu bora iweze kutolewa.”Mazige alisema.

Kwa upande wake Diwani wa kata ya Kibindu Mheshimiwa Ramadhani Mkufya aliishukuru kamati ya huduma za jamii kwa kufika katika kata yake na kujionea changamoto zinazoikabili sekta za Elimu na Afya na kutoa ombi kwa kamati ili kukamilisha madarasa yanayojengwa na kuanza kujenga miundombinu ya afya ili kuondokana na kero mbalimbali zinazowakabili wananchi wa Kibindu.

Hata hivyo Mwenyekiti wa Kamati ya Afya ,Elimu na Maji Mheshimiwa Malota Hussein aliwaagiza wataalam kufanya tathmini ya ujenzi na kubaini gharama zinazohitajika ili kukamilisha ujenzi huo ili kuiwasilisha katika vikao vya maamuzi kwa hatua zaidi.

Madiwani na Wataalam wakikagua Ujenzi wa madarasa shule ya Msingi Kibindu,Kata ya Kibindu