Miundombinu ya Shule ya Msingi Msoga kuboreshwa

Imewekwa: November 3rd, 2022

Mkurugenzi wa Halmashauri ya wilaya ya Chalinze , Bwana  Ramadhani Possi ameahidi kuboresha mazingira ya kufundishia na kujifunzia kwa kutatua changamoto ya upungufu wa vyoo vya wanafunzi ,nyumba za walimu na ukosefu wa maji katika shule ya Msingi Msoga.

Ramadhani Possi ametoa ahadi hiyo leo katika mahafali ya wanafunzi wa darasa la saba alipokuwa akitoa hotuba yake kama mgeni rasmi.

“Nimepokea changamoto zinazoikabili shule hii kama upungufu wa matundu ya vyookwa wanafunzi,upungufu wa nyumba za walimu na ukosefu wa maji katika shule hii,utatuzi wa kero hizi utafanyika kwa awamu kwa kadiri tunavyokusanya mapato yetu ya ndani na kwa mwaka wa fedha ujao nyumba moja kwa ajili ya walimu itajengwa.” Possi alisema.

Aidha Mkurugenzi Possi aliwataka wazazi kushirikiana na walimu katika kuboresha mazingira ya kufundishia na kujifunzia ili kuinua kiwango cha ufaulu wa shule hiyo,sanjari na kuhakikisha watoto wanapokuwa shuleni wanapata chakula cha mchana.

Naye Afisa Elimu Awali na Msingi, Bi: Miriam Kihiyo aliwasihi wazazi,walimu na wanafunzi kutekeleza majukumu yao ili kuinua kiwango cha ufaulu kwa wanafunzi na kuwataka wazazi kuwa chachu na hamasa kwa watoto wao katika kufanya vizuri katika masomo na siyo kuwahadaa waandike vibaya katika mitihani.

Kwa upande wake Diwani wa kata ya Msoga na Mwenyekiti wa Halmashauri ya wilaya ya Chalinze,Hassani Mwinyikondo alitoa shukrani za dhati kwa Mgeni rasmi kwa kukubali kwake na hatimaye kutatua changamoto mbalimbali zinazoikabili shule ya Msingi Msoga.

“Nikupongeze Mgeni rasmi kwa kukubali kwako kushiriki nasi katika mahafali hii ya kuwapongeza vijana wetu kuhitimu elimu ya msingi lakini pia kutatua changamoto zinazoikabili shule hii kwa lengo la kuboresha mazingira ya kujifunzia na kufundishia,tunakushukuru sana.” Mwinyikondo alisema.