Mkakati wa Kudhibiti Magonjwa ya Mifugo Wazinduliwa Kitaifa

Imewekwa: August 3rd, 2018

Waziri wa Mifugo na Uvuvi,Mheshimiwa Luhaga Mpina amezindua Mkakati wa Kudhibiti Magonjwa ya Mifugo na Matumizi ya Dawa,Chanjo na Viuatilifu vya Mifugo kitaifa katika kijiji cha Chamakweza katika Halmashauri ya Chalinze Mkoani Pwani hivi karibuni.

Katika uzinduzi huo Mheshimiwa Mpina amechukua hatua za makusudi kutokana na umuhimu wa sekta ya mifugo nchini ili kuondoa umasikini,kuchangia katika kuhakikisha usalama wa Chakula,kutengeneza ajira pamoja na kuwa na hazina kubwa ya rasilimali mifugo katika taifa.”Sekta ya Mifugo inakabiliwa na Changamoto nyingi ikiwa ni pamoja na vifo vingi vya Mifugo vinavyosababishwa na magonjwa mengi hususan yale yanayoenezwa na kupe na yale ya mlipuko.Changamoto hizo zinasababisha Sekta ya Mifuo kutokuwa na tija hivyo kutochangia katika pato ghafi la taifa kama inavyotarajiwa.”Mpina alisema.

Katika kukabiliana na changamoto hizo mkakati ulioandaliwa unalenga kufanya mapitio ya Sheria na kanuni mbalimbali,kuweka utaratibu utakaohakikisha upatikanaji wa dawa,chanjo na viuatilifu muhimu nchini ikiwa ni pamoja na kuimarisha Taasisi ya Chanjo(TVI Kibaha),kutoa elimu na kuhamasisha wafugaji na wadau juu ya udhibiti wa magonjwa,kuimarisha mfumo wa utambuzi na uchunguzi wa magonjwa ya wanyama,kuimarisha vitengo vya ukaguzi na ufuatiliaji na kuendeleza miundombinu ya majosho kwa kujenga na kukarabati yaliyopo, Waziri Mpina alisisitiza katika hotuba yake ya uzinduzi wa mkakati wa kudhibiti magonjwa ya mifugo nchini.

Aidha katika hotuba yake aliziagiza mamlaka za serikali za mitaa nchini kusimamia zoezi la uogeshaji mifugo na kukarabati miundombino ya majosho nchini ili kutekeleza kwa vitendo mkakati wa kuboresha sekta ya mifugo nchini,ameziagiza halmashauri nchini kote kukarabati majosho ifikapo tarehe 30/12/2018 halmashauri zote nchini ziwe zimekarabati majosho” kwa halmashauri zitakazoshindwa kutekeleza kwa mamlaka niliyonayo nitazifungia kukusanya mapato yatokanayo na mifugo” Waziri Mpina alisema. Pia aliwataka maafisa ugani au watendaji wa sekta ya mifugo kutekeleza majukumu yao kwa mujibu wa sheria ili kuwahudumia wafugaji kwa lengo la kuijengea tija sekta ya mifugo.

Kwa upande wake Katibu wa Chama cha Wafugaji Tanzania Bwana Magembe Makoye aliishukuru serikali ya awamu ya tano kupitia Wizara ya Mifugo na Uvuvi kwa kuzindua Mkakati bora unaolenga kuiboresha na kuiimarisha sekta ya mifugo nchini na kuiwezesha kuzalisha ili kuunga mkono jitihada za serikali za uendelezaji viwanda kwani sekta ya mifugo ni chimbuko la malighafi za viwandani.

Hata hivyo Makoye alimwomba waziri katika mkakati wake wa kuboresha sekta ya mifugo ayalinde maeneo yaliyotengwa kwa shughuli za ufugaji nchini ili kuondokana na migogoro inayoweza kutokea kwa kubadili matumizi ya ardhi kinyume cha sheria na kuomba idhini kwa niaba ya wafugaji ili waruhusiwe kuchungia maeneo ya Ranchi za taifa kipindi cha ukame na ukosefu wa nyasi ili kuinusuru mifugo wakati wa njaa.

   Naye Mkurugenzi wa Mifugo nchini Dkt.Martin Ruheta alitoa ufafanuzi wa Mkakati wa Kudhibiti Magonjwa ya Mifugo na matumizi ya Dawa,Chanjo na Viuatilifu lengo likiwa ni kupambana na magonjwa ya mifugo kama Mdondo(ND),Ndigana kali(ECF) na Homa ya Mapafu ili ufugaji nchini uwe ufugaji wa tija na endekevu.Aliendelea kusisitiza kuhusu mkakati huu kuwa wizara ya mifugo imejiandaa kuwekeza katika kiwanda cha chanjo cha Kibaha(TVI) ili chanjo zote Muhimu nchini zizalishwe ndani ya nchi ili kumwondelea mfugaji kero ya upatikanaji chanjo na dawa za mifugo.

Aidha Mkurugenzi Ruheta alisistiza Mkakati huu utatekelezeka kwani wizara imejipanga kujenga majosho na kukarabati yaliyopo na kila halmashauri nchini inatakiwa kukarabati majosho na kusimamia zoezi la uogeshaji mifugo na utoaji chanjo mbalimbali za mifugo,Kuimarisha  mfumo wa utambuzi na uchunguzi wa magonjwa ili kubaini na kuchukua hatua kwa wakati,Ukaguzi na udhibiti-dawa,chanjo na viuatilifu ili kuwa na dawa na viuatilifu vyenye  ubora na viwango vinavyotakiwa.

Mwenyekiti wa Kijiji cha Chamakweza Bwana Mika Laini kwa niaba ya wananchi na wafugaji wa kijiji chake aliishukuru serikali ya awamu ya tano kwa Mkakati wa kuboresha sekta ya Mifugo na kuwajali wafugaji kwa kuwahakikishia upatikanaji wa dawa za mifugo kwa bei nafuu na zenye ubora unaotakiwa.

Waziri wa Mifugo na Uvuvi katika picha ya Pamoja na Wafugaji wa Kijiji cha Chamakweza katika Halmashauri ya Chalinze Mkoani Pwani