Mkurugenzi Kiwanuka Awafunda Watumishi Chalinze

Imewekwa: August 31st, 2018

Mkurugenzi Mtendaji wa Halmashauri ya wilaya ya Chalinze, Bi Amina Kiwanuka awafunda watumishi wake kwa kuwataka kufanya Kazi kwa kuzingatia sheria taratibu na kanuni za Utumishi wa umma. Nasaha hizo amezitoa Leo alipokuwa akizungumza na watumishi hao katika ukumbi wa Halmashauri ya wilaya,baada ya kuwa ameripoti katika Halmashauri hiyo akitokea Halmashauri ya wilaya ya Wanging'ombe kufuatia mabadiliko ya wakurugenzi watendaji yaliyofanywa na Mheshimiwa Rais wa Jamhuri ya Muungano hivi karibuni.

Mkurugenzi Kiwanuka amewataka wafanyakazi wa Chalinze kufanya Kazi kwa weledi na kutumia Taaluma zao kumshauri katika utendaji Kazi bila kupotosha kwa kuzingatia sheria zinatawala utendaji Kazi na miiko ya Kazi husika.

Aliendelea kufafanua kuwa kufika kazini kwa wakati na kuondoka kwa wakati ni kwa mujibu wa kanuni za kudumu za Utumishi wa umma za mwaka 2009 ni kitu ambacho kila mtumishi anakifahamu,hivyo ni suala la utekelezaji.

Vilevile Kiwanuka aliwataka watumishi kuwa na utamaduni  wa kutunza Mali za halmashauri kwa maana ya kumbukumbu na magari,akasisitiza utunzaji wa majalada yanayokuwa na barua za maelekezo na maagizo mbalimbali."Barua zisichelewe kufika kwangu na kwa mhusika ili utekelezaji wa majukumu uende kwa wakati."Kiwanuka alisema.

Mkurugenzi aliendelea kuwaasa watumishi kutumia lugha za kiutumishi na zenye sitaha wanapokuwa wanawahudumia wateja,kuvaa mavazi yenye sitaha na yenye kulinda haiba ya Utumishi kwa mujibu wa waraka wa mavazi kwa watumishi wa umma."Tuvae nguo ambazo zinakubalika kwa mujibu wa sheria."Mkurugenzi alisisitiza.

Kwa upande wa ukusanyaji mapato aliwaagi watumishi wote kuwa wasimamizi wa Mapato ya Halmashauri kwani ajenda ya kupandisha Mapato ni ajenda ya kitaifa hivyo,"Idara na vitengo zijipange kwa kuweka mikakati mipya ya kupandisha Mapato na kubuni vyanzo vipya kwa misingi ya kuongeza Mapato katika Halmashauri yetu."Kiwanuka aliagiza.Mkurugenzi Kiwanuka alimalizia hotuba yake kwa kusisitiza suala la mahusiano mema kazini kwa watumishi wote na utunzaji wa siri za serikali kwa kila mtumishi wa umma,"Ni kosa kisheria kutoa siri au taarifa za serikali kama siyo msemaji au hujapewa idhini ya kutoa taarifa husika,niwatakie utekelezaji mwema kwa maelekezo niliyoyatoa."Kiwanuka alisema

Kwa upande wake Bi Miriam Kihiyo kwa niaba ya watumishi wa Halmashauri alitoa neno la shukurani kwa Mkurugenzi Kiwanuka kwa nasaha zake nzuri na kuahidi kutoa ushirikiano kwa Mkurugenzi na kuyafanyia Kazi maelekezo yote yaliyotolewa kwa mujibu wa sheria taratibu na kanuni.