Mkurugenzi Mtendaji Halmashauri ya Chalinze afanya mazungumzo na Walimu wa Michezo na Wanafunzi watakao shiriki UMITASHUMTA Mkoa wa Pwani

Imewekwa: May 29th, 2021

Mkurugenzi Mtendaji wa Halmashauri ya Chalinze Ndugu: Ramadhani Possi amekutana na Walimu wa michezo na wanafunzi wapatao 76 (Wasichana 36 na Wavulana 40) wa Shule za msingi waliochaguliwa kuiwakilisha Halimashauri ya Chalinze katika mashindano ya michezo kwa shule za msingi (UMITASHUMTA) yatakayo fanyika Kibaha Mkoani Pwani kuanzia Tarehe 30.05.2021. Hayo yamefanyika leo katika hafla fupi ya kuwaaga wanamichezo hao iliofanyika katika viwanja vya Halmashauri. Ndugu Possi alikutana na wanafunzi kwa lengo la kuongeza hamasa na kuwapa moyo wanapoelekea katika michuoano ya UMITASHUMTA ili waweze kufanya vizuri katika michuano hiyo na kupelekea Chalinze kuwa kinara katika sekta ya Michezo

Nae Afisa Elimu Msingi  Wilaya Bi. Zainabu Makwinya akitoa neno la utangulizi kabla ya kumkaribisha Mkurugenzi Mtendaji kuzungumza na wanamichezo waliochaguliwa kuiwakilisha Halmashauri ya Chalinze katika Michuano ya UMITASHUMTA Mkoa wa Pwani alisema “Kuna jumla ya Wanafunzi 76 na walimu wa Michezo 7 wanaokwenda Kibaha kushiriki mashindano ya mchujo kwa lengo la kupata timu ya Mkoa wa Pwani watakaoshiriki katika michuano hiyo kitaifa inayotegemea kufanyika Mkoa wa Mtwara. Zipo changamoto nilizo zifikisha kwako ikiwemo ufinyu wa bajeti hivyo tunaomba kwa nafasi yako kama mkuu wa taasisi uone namna ya kuwezesha watu hawa(Walimu wa Michezo) ili wapate motisha wa kuendelea kufundisha na kusimamia michezo kwa wanafunzi ili kufanya Halmashauri kuwa kinara katika sekta ya michezo kati ya Halmashauri zote za Mkoa wa Pwani.

Akizungumza na Walimu na Wanafunzi hao Mkurugenzi Mtendaji wa Halmashauri ya Chalinze Ndugu, Ramadhani Possi alisema “ Napenda kutoa pongezi zangu za dhati kwa uongozi wa Elimu Msingi Wilaya, Walimu wa michezo na Wanafunzi wote mliochaguliwa kuwakilisha Chalinze katika Michuano ya UMITASHUMTA Mkoa wa Pwani. Wito wangu kwenu ni kuwa fuateni maelekezo na mafunzo mliopewa na walimu wenu, mshiriki michezo hiyo kwa adabu utii na nidhamu ya hali ya juu ili mtuwakilishe vyema, kwani mkifanya vizuri jina la Chalinze kimichezo likuwa na kama mtafanya vibaya aibu itakuwa kwa uonguzi wa Halmashauri hususani Mkurugenzi Mtendaji’’.

Ndugu, Ramadhani Possi aliongeza kusema "ziko faida nyingi kwa ninyi kama wanafunzi kujihusisha katika michenzo ikiwa ni pamoja na kujenga afya, kudumisha umoja na kuongeza watu wapya wa kufahamiana nao(Connection) , Kukua na kukomaa kiakili na hata kujiajili kupitia michezo. Tofauti na miaka ya nyuma sasa mchezaji anaweza kutumia kipaji chake kujipatia kipato na sehemu sahihi ya kukuza kipaji hicho ni pamoja na kushiriki katika michuano mbalimbali ikiwemo UMITASHUMTA".

Ndugu: Ramadhani Possi alikili kupokea changamoto mbalimbali za uendeshaji wa mashindano hayo na kuahidi uongozi wa Elimu Msingi na Afisa Michezo na Utamaduni kuwa changamoto hizi zitatatuliwa kabla au ifikapo siku ya Jumanne wiki inayokuja,

Akihitimisha mazungumzo na wanamichezo hao Ndugu Possi aliwatakia safari njema  na yenye mafanikio waendapo huko Kibaha kwenye mashidano ya michezo (UMITASHUMTA).