Mkurugenzi Mtendaji Halmashauri ya Chalinze Ramadhani Possi afanya kikao na wafanyabiashara wa Chalinze.

Imewekwa: January 29th, 2026

Mkurugenzi Mtendaji wa Halmashauri ya Wilaya ya Chalinze, Bwana Ramadhani Possi, amefanya kikao kazi na wafanyabiashara wa Mamlaka ya Mji Mdogo wa Chalinze kwa lengo la kutoa elimu kuhusu masuala ya biashara, kodi na uzingatiaji wa sheria na taratibu za biashara.

Kikao hicho kimefanyika Jana katika Ukumbi Mdogo wa Mkurugenzi uliopo Makao Makuu ya Halmashauri ya Wilaya ya Chalinze, kikilenga kuwajengea uelewa wafanyabiashara juu ya wajibu wao kama walipa kodi na umuhimu wa kufanya biashara kwa kuzingatia sheria.

Katika kikao hicho, wafanyabiashara walipatiwa elimu kuhusu mchakato wa kuanzisha biashara, ukataji wa leseni za biashara pamoja na vigezo vinavyotakiwa kuzingatiwa. Akitoa elimu hiyo, Afisa Biashara wa Halmashauri, Bi. Zamzam Kabogota, aliwasisitiza wafanyabiashara kuhakikisha wanakata leseni za biashara kwa wakati na kuhuisha leseni hizo mara tu muda wake unapokwisha.

Kwa upande wake, Afisa Biashara Shukuru Masenga alitoa elimu kuhusu ushuru wa huduma, akieleza faida za ulipaji wa ushuru huo kwa wafanyabiashara na kwa maendeleo ya halmashauri kwa ujumla. Masenga alifafanua kuwa kuanzia mwezi Julai 2025, kiwango cha ushuru wa huduma kimepunguzwa kutoka asilimia 0.3 hadi asilimia 0.25, hatua iliyochukuliwa na Serikali kwa lengo la kuwapunguzia mzigo wafanyabiashara.

Naye Mkuu wa Idara ya Biashara, Viwanda na Uwekezaji, Bi. Prisca Mtendamema, aliwaeleza wafanyabiashara umuhimu wa kulipa kodi na ushuru mbalimbali kwa Halmashauri, akibainisha kuwa mapato hayo huiwezesha Halmashauri kutoa huduma muhimu kwa wananchi ikiwemo ujenzi wa zahanati, shule, madarasa na ufungaji wa taa za barabarani.

Aidha, Mkuu wa Kitengo cha Huduma za Sheria cha Halmashauri, Wakili Rose Kamugisha, aliwakumbusha wafanyabiashara kuzingatia sheria za nchi kwa kulipa kodi na ushuru stahiki kwa mujibu wa Sheria ya Fedha za Serikali za Mitaa, Sura ya 290, kama ilivyofanyiwa marejeo mwaka 2023.

Kwa ujumla, kikao hicho kimeongeza uelewa kwa wafanyabiashara kuhusu masuala ya kodi na biashara, na kuimarisha ushirikiano kati ya Halmashauri ya Wilaya ya Chalinze na wafanyabiashara.