Mkuu wa Wilaya Bagamoyo ataka Miongozo kuzingatiwa Katika Zoezi la Anwani za Makazi

Imewekwa: March 18th, 2022

MKUU wa Wilaya ya Bagamoyo Zainabu Abdallah  ameonya watu kushinikiza majina yao kuwekwa kwenye vibao na badala yake wananchi wanatakiwa kushiriki kukubaliana kwa pamoja jina litakalofaa kwenye mitaa yao.

Zainabu ametoa maelekezo hayo wakati akizindua zoezi la anuani ya makazi pamoja na sensa katika Halmashauri ya Chalinze ambapo litaenda sambamba na kuweka vibao kwenye mitaa na Vitongoji.

Akizungumza katika uzinduzi huo mkuu huyo wa wilaya alisema jina la mtaa linatakiwa kujadiliwa na wananchi walipitishe kwa pamoja na isiwe kwa matakwa ya watu wachache.

"Wapo baadhi ya watu kulazimisha mitaa kuandikwa majina yao, asiwepo mtu wa kulazimisha mtaa uandikwe jina lake makubaliano yafanywe na wananchi wenyewe" alisisitiza.

Mkuu huyo wa wilaya alisema Halmashauri hiyo tayari imepokea kiasi cha sh. Miln 81.6 kwa ajili ya kazi ya anuani ya makazi ambayo Halmashauri hiyo inatakiwa kuikamilisha ifikapo April 30.

Mwenyekiti wa Chama Cha  Mapinduzi (CCM) wilaya ya Bagamoyo  Abdul Sharif aliwataka wananchi kutoa ushirikiano kwa wataalamu lakini pia aliwasihi walioteuliwa kutekeleza kazi hiyo kuifanya kwa bidii.

Mwenyekiti wa Halmashauri ya Chalinze Hassan Mwinyikondo aliahidi kuwa kazi ya anuani ya makazi kukamilika kablq ya April 30 kutokana na vijana waliowateua kufanya kazi hiyo kutoka kwenye maeneo ya kwenye kata na Vijiji husika jambo ambalo litaleta urahisi kwao.

Naye Mkurugenzi wa Halmashauri hiyo Ramadhani Posi alisema  Halmashauri hiyo ina kata 15 kati ya hizo mbili tayari ziko katika Mamlaka ya mji mdogo ambazo zina barabara 288 na kata 13 zenye vitongoji 469.

Posi alisema Halmashauri hiyo itatoa kipaumbele kwa kazi ya anuani ya makazi kufanyika na kumalizika kabla ya April 30  kwa weledi unaotakiwa.

Mwajuma Selemani na Mwanaisha Juma waliipongeza Serikali ya Rais Samia kwa kazi hiyo ya anuani ya makazi ambayo itarahisisha kutoa maelekezo ya maeneo wanayoishi.

DC Zainabu akizindua zoezi la Mfumo wa Anwani za Makazi 

DC Zainabu akiweka kibao cha kutambulisha jina la Barabara katika Halmashauri ya Chalinze