Mkuu wa wilaya ya Bagamoyo akutana na wenyeviti wa vitongoji Chalinze kwa maandalizi ya Sensa

Imewekwa: August 16th, 2022

Mkuu wa wilaya ya Bagamoyo Mheshimiwa Zainabu Abdallah amekutana na wenyeviti wa vitongoji 469 katika halmashauri ya Chalinze na kuwahamasisha wenyeviti hao kushiriki katika zoezi la sensa ya watu na makazi wao pamoja na wananchi wanaowaongoza katika maeneo yao,wito huo umetolewa na  Mkuu wa wilaya alipokutana na wenyeviti hao katika ukumbi wa mikutano katika shule ya sekondari ya Lugoba katika halmashauri ya Chalinze.

Mheshimiwa Zainabu aliwahamasisha wenyeviti wa vitongoji kwa kuwaeleza umuhimu wa sensa ya watu na makazi kwa taifa na faida zinazoweza kupatikana kutokana na zoezi la sensa ya watu na makazi ikiwa ni pamoja na serikali kuiwezesha kupanga mipango ya maendeleo kutokana na idadi ya wananchi waliopo sanjari na utoaji wa huduma za jamii kama maji,umeme,afya ,elimu na mahitaji mengineyo kulingana na malengo ya serikali.

Mkuu wa wilaya aliendelea kuwaelimiisha wenyeviti wa vitongoji kuhusu aina za madodoso yatakayotumika katika ukusanyaji wa taarifa ni ya aina tatu ambayo ni,dodoso la jamii litakalohusisha shughuli zote za kiuchumi na kijamii  ambazo ni hospitali,shule,majengo ya serikali na binafsi,dodoso la sensa au dodoso kuu ambalo linashughulika na taarifa zote za mtu binafsi na kaya,dodoso la majengo linashughulika na ukusanyaji wa taarifa za nyumba na makazi katika eneo husika, dodoso la makundi maalum ambalo linahusisha kaya zote ambazo hazina sehemu maalum za kuishi( kaya zinazohamahama). Kuu wa wilaya aliwataka wenyeviti wa vitongoji kuwa wazalendo na waelimishaji wakuu wa zoezi la sensa ya watu na makazi na kuwa wahamasishaji wakuu katika vitongoji wanavyoishi na hatimaye kulikamilisha zoezi hili kwa ufanisi mkubwa .” Niwataka viongozi wenzangu tukawe mstari wa mbele katika utekelezaji wa zoezi hili la sensa ya watu na makazi ili mipango ya maendeleo iweze kupangwa kulingana na idadi yetu katika maeneo yetu na hatimaye kero za wananchi ziweze kutatuliwa pasipo mashaka.” Mheshimiwa Zainabu alisema.

Naye Mbunge wa viti maalum mkoa wa Pwani Mheshimiwa Subira Mgalu katika kuhamasisha zoezi la sensa ya watu na makazi aliwapongeza wenyeviti wa vitongoji kwa kuitikia wito na kuweza kufika katika mkutano wa mkuu wa wilaya kutoka sehemu mbalimbali katika halmashauri ya Chalinze na hatimaye kupata elimu ya umuhimu wa sensa ya watu na makazi na kuwataka wawe mstari wa mbele katika kuhakikisha zoezi hili la kitaifa linatekelezwa kwa ufanisi wa hali ya juu.

Wenyeviti wa vitongoji katika halmashauri ya wilaya ya Chalinze wakiwa kwenye kikao cha maandalizi ya Sensa 2022