Mkuu wa wilaya ya Bagamoyo Awahimiza Madiwani kutatua kero za wananchi ili kushinda Uchaguzi

Imewekwa: August 29th, 2024

Mkuu wa Wilaya ya Bagamoyo, Halima Okash, amewataka Madiwani wa Halmashauri ya Chalinze kuhakikisha wanawafikia wananchi na kutatua kero zao ili Chama cha Mapinduzi (CCM) kipate ushindi mkubwa katika chaguzi zijazo. Akizungumza katika kikao cha Baraza la Madiwani kilichofanyika Agosti 29, Okash alisisitiza umuhimu wa kutekeleza miradi ya maendeleo inayochochea ukuaji wa uchumi ili kuendelea kupata uungwaji mkono wa wananchi.

Mwenyekiti wa Halmashauri ya Chalinze, Hassan Mwinyikondo, aliunga mkono wito huo na kusisitiza Madiwani kufuata utaratibu huo katika maeneo yao, ili kurahisisha ushindi wa viongozi wa ngazi za mitaa na vijiji. Katika kikao hicho, Mwinyikondo alimshukuru Mbunge wa Chalinze, Ridhiwani Kikwete, kwa kutoa gari litakalotumika katika shughuli za kijamii, ikiwemo kusaidia usafirishaji wa miili ya marehemu na kurahisisha ziara za Madiwani kusikiliza kero za wananchi.

Aidha, Mkurugenzi Mtendaji wa Halmashauri hiyo, Ramadhani Possi, aliwasisitiza Madiwani kuwasilisha miradi ambayo haijakamilika mapema ili ipangiwe bajeti kwa wakati, akibainisha kuwa hatua hiyo itasaidia kukamilisha miradi viporo na kutekeleza miradi mipya. Halmashauri ya Chalinze imefanikiwa kukusanya mapato kwa asilimia 103 katika bajeti ya 2023/2024 na inajipanga kuendelea kuimarisha ukusanyaji wa mapato ya ndani kwa ajili ya maendeleo zaidi.