Mpwimbwi achaguliwa kuwa Makamu mwenyekiti wa Halmashauri ya Chalinze

Imewekwa: August 26th, 2022

Baraza la Madiwani wa Halmashauri ya wilaya ya Chalinze katika Mkutano wake wa kufunga mwaka limemchagua  Mheshimiwa Juma Mpwimbwi,Diwani wa kata ya Miono kuwa Makamu Mwenyekiti wa Halmashauri kwa kupata kura 21 za ndiyo sawa na asilimia miamoja (100%) ya kura zote zilizopigwa. Uchaguzi huo ulifanyika katika ukumbi wa mikutano wa Jakaya Kikwete alimarufu kama “KIKWETE HALL”.

Baada ya Uchaguzi wa Makamu mwenyekiti wa Halmashauri kukamilika Mwenyekiti wa Halmashauri alifanya uteuzi wa wajumbe mbalimbali wa kamati za kudumu za Huduma za jamii,Uchumi,Ujenzi na Mazingira,Kamati ya Maadili,Kamati ya kudhibiti UKIMWI na Kamati ya Fedha Uongozi na Mipango.

Mwenyekiti wa Halmashauri baada ya kukamilisha uteuzi wa wajumbe wa kamati mbalimbali aliwapa fursa wajumbe hao kukaa kama kamati na kuchagua wenyeviti wao kwa kila kamati.

Wajumbe wa kamati ya Afya,Elimu na Maji walimchagua Mheshimiwa Selestini Semiono,Diwani wa Kata ya Msata kuwa Mwenyekiti wa kamati hiyo kwa mwaka 2022/2023.

Wajumbe wa kamati ya Uchumi,Ujenzi na Mazingira walimchagua Mheshimiwa Mussa Gama,Diwani wa kata ya Vigwaza kuwa Mwenyekiti wa kamati hiyo kwa mwaka 2022/2023.

Nayo kamati ya Maadili ilimchagua Mheshimiwa Mwanakessi Madega kuwa mwenyekiti wa kamati hiyo kwa mwaka 2022/2023.

Kwa upande wake Makamu mwenyekiti,Juma Mpwimbwi aliwashukuru Madiwani kwa kumwani na kumchagua kwa kura nyingi na kuahidi kuilinda imani kwa kuwatumikia wanachalinze kwa uadilifu mkubwa na kuahidi kumsaidia mwenyekiti katika utekelezaji wa Majukumu mbalimbali kwa maslahi ya wanachalinze 

“Nitasimamia maslahi ya madiwani na kuwa kiungo kati ya madiwani na wataalam sanjari na kuhakikisha Madiwani wanakuwa na bima za afya.” Mpwimbwi alisema.

Alimalizia kwa kuwataka Madiwani na watendaji kufanya kazi kwa ushirikiano ili kuwaletea Maendeleo wanachalinze na watanzania kwa ujumla.

                                 Kamati ya Uchumi,Ujenzi na Mazingira katika picha ya Pamoja