Mradi wa Ujenzi wa Shule ya Sekondari Mbwewe Watambulishwa kwa Wananchi

Imewekwa: July 4th, 2023

KIKAO CHA KUTAMBULISHA MRADI WA UJENZI WA SHULE YA SEKONDARI MBWEWE CHAFANYIKA 

Menejimenti ya Halmashauri ya wilaya ya Chalinze leo hii imefanya kikao na Kamati ya Maendeleo ya kata ya Mbwewe kwa ajili ya kutambulisha Mradi wa Ujenzi wa Shule mpya ya Sekondari katika Kata ya Mbwewe. Kikao hicho cha kutambulisha mradi kimefunguliwa na Mheshimiwa Diwani wa kata ya Mbwewe Abass Msonde.

Menejimenti ya Halmashauri ya Chalinze imefanya Kikao hicho baada ya kupokea fedha kutoka Serikali kuu kwa ajili ya Ujenzi wa Shule mpya ya Sekondari ambayo itaanza kujengwa mapema iwezekanavyo. Halmashauri ya wilaya ya Chalinze imepokea jumla ya fedha za kitanzania zaidi ya milioni 528.

Katika Kikao hicho cha kamati ya Maendeleo ya kata,Afisa Elimu Sekondari wa Halmashauri ya Chalinze Bi.Salama Ndyetabura alitoa maelezo kuhusu mawanda ya mradi kwa niaba ya Mkurugenzi Mtendaji wa Halmashauri kwa kuwataka wajumbe kuupokea mradi kwa niaba ya wananchi wa Kata ya Mbwewe.

Aidha katika kikao hicho wataalam mbalimbali kutoka Halmashauri walitoa maelekezo na miongozo mbalimbali ya namna ya utekelezaji wa mradi huo kwa kuzingatia Sheria taratibu na Kanuni za manunuzi, ikiwa Ni pamoja na kuunda Kamati mbalimbali zitakazosimamia utekelezaji wa mradi huo.

Kwa upande Wake Afisa Mipango wa Halmashauri ya wilaya ya Chalinze Bwana Peter Paul aliwataka wajumbe wa Kamati ya Maendeleo ya kata na wananchi kwa ujumla kuwa wazi katika utendaji au utekelezaji wa miradi ya Maendeleo hususan Ujenzi wa Shule hii mpya,amewataka wajumbe wa Kamati za Utekelezaji na Mapokezi ya vifaa vya ujenzi kufanya kazi kwa uadilifu na uwazi kwani Shule hii ni ya wananchi hivyo tunatakiwa kuwa wazalendo.