Msoga Half Marathon Mkombozi wa afya za akinamama na watoto wanaozaliwa kabla ya wakati.

Imewekwa: June 29th, 2024

Mashindano ya mbio za Msoga Half Marathon yaliyoandaliwa na Mheshimiwa Ridhiwani Kikwete(Mb) na Naibu Waziri wa Nchi Ofisi ya Rais ,Menejimenti ya Utumishi na Utawala Bora, yaliandaliwa kwa ajili ya kusaidia upatikanaji wa vifaa tiba mbalimbali katika Hospitali ya wilaya Msoga inayohudumia wakazi wote wa halmashauri ya Chalinze na wananchi wengine wa nje ya halmashauri ya Chalinze.

Mbio hizo zimefanyika leo katika kijiji cha Msoga na kuwa na washiriki mbalimbali kutoka maeneo mbalimbali hapa nchini,kama Dar es salaam,Mwanza,Arusha,Kilimanjaro,Pwani na Njombe. Pamoja na washiriki hao viongozi mbalimbali wa kisiasa na dini wameshiriki katika shughuli hiyo ili kuunga mkono juhudi za upatikanaji wa vifaa tiba kwa ajili ya akina mama na watoto wanaozaliwa kabla ya wakati.

Viongozi waliofika katika shughuli hiyo ya mbio za Msoga Half Marathon ni Mheshimiwa Profesa Adolf Mkenda(Mb) ambaye pia ni Waziri wa Elimu Sayansi na Teknolojia,Askofu Josephat Gwajima(Mb) na Kiongozi wa kanisa la Ufufuo na Uzima, Askofu Mwampossa na Mheshimiwa Rais Mstaafu wa Awamu ya nne, Dkt. Jakaya Mrisho Kikwete ambaye alikuwa mwenyeji wao katika shughuli hiyo.

Shughuli hiyo ilipambwa na burudani mbalimbali zilizochagizwa na wasanii mbalimbali hapa nchini ili kutatua kero inayowakabili akina mama na watoto wanaozaliwa kabla ya wakati.

Mgeni Rasmi katika hafla hiyo Dkt Jakaya Kikwete alitoa shukrani za dhati kwa washiriki wote wa mashindano hayo  na kuwapongeza wanariadha kwa kuweza kukimbia kilomita za kutosha katika mashindano hayo,ambayo yalikuwa na umbali wa kilomita 21,kilomita 10 na kilomita 05.

Aidha Kikwete aliwashukuru wafadhili wote walioshiriki katika kuwezesha mashindano hayo na kwa kuonyesha upendo wa hali ya juu kwa akinamama na watoto wanaozaliwa kabla ya wakati. Sanjari na shukrani hizo Mgeni rasmi alitoa zawadi kwa washindi wa mashindano hayo na kutoa vyeti vya shukrani kwa wahisani wote waliowezesha shughuli hiyo.

Kwa upande wake Mheshimiwa Ridhiwani Kikwete alitoa shukrani kwa wachangiaji wote waliojitoa kwa hali na mali katika kufanikisha jambo hili muhimu la kuokoa uhai wa akinamama na watoto wanaozaliwa kabla ya wakati. Sanjari na shukrani hizo kipekee aliwashukuru wabunge wenzake na viongozi wa dini kwa kuona umuhimu wa jambo hili na kuacha shughuli zao na kuja kuungana naye ili kuokoa maisha ya wanachalinze na watanzania kwa ujumla.