MWENGE WA UHURU WAMURIKA NA KUANGANZA HALMASHAURI YA CHALINZE

Imewekwa: June 9th, 2017

Mwenge wa Uhuru 2017 Halmashauri ya Chalinze umepita katika vijiji 7 vyenye jumla ya miradi 9 ambapo, Mradi 1 umewekewa jiwe la msingi, miradi 05 Imezinduliwa na miradi 03 imekaguliwa, miradi ipo katika sekta za Afya, Elimu, Maji, Kilimo, Maendeleo ya Jamii, Mashirika yasiyo ya Kiserikali, Watu binafsi. Thamani ya miradi hiyo ni Jumla ya Tshs. 110,466,950,250.00 kwa mchanganuo ufuatao

• Watu binafsi Tshs 110,004,455,000.00
• Wananchi wamechangia Tshs 65,000,000.00,
• Halmashauri Tshs 91,500,000.00 na
• Wahisani Tshs 305, 950,,250.00

Aidha, katika maeneo ambayo Mwenge umepita ulikuwa umebeba ujumbe usemao “SHIRIKI KUKUZA UCHUMI WA VIWANDA KWA MAENDELEO YA NCHI YETU” Kauli mbiu hii imeambatana na Mapambano dhidi ya Rushwa, Mapambano dhidi ya VVU/UKIMWI, Mapambano dhidi ya Matumizi ya Dawa za Kulevya na Mapambano dhidi ya Malaria.

Akizungumza katika Eneo la makabidhiano ya Mwenge(Kiwangwa) Mkuu wa Wilaya ya Bagamoyo Mh. Alhaj Magid Mwanga alisema Hali ya uwekezaji katika Halmashauri ya Chalinze umeanza kwa kasi kutokana na uwepo wa mazingira mazuri na vivutio vingi vya uwekezaji ikiwa ni pamoja na miundombinu ya barabara, maji, umeme, mawasiliano ya simu, ardhi yenye rutuba, mito, bahari na fukwe.

Hali halisi ya sasa ni uwepo wa ujenzi unaoendelea wa Viwanda vikubwa Vitatu ambavyo ni

• Kiwanda cha Vigae (tiles) Twyford Industry ambacho kipo katika kitongoji cha Pingo kata ya Pera.
• Ujenzi wa Kiwanda cha Matunda cha Sayona Industry unaendelea na kipo katika kijiji cha mboga kata ya Msoga.
• Ujenzi wa Kiwanda cha Sementi (Lake Cement) unaoendelea kipo katika kijiji cha Talawanda kata ya Talawanda.

Pia Halmashauri ya Chalinze ina Viwanda ambavyo viko katika hatua za awali za upimaji na upatikanaji wa vibali. Viwanda hivyo ni:-

• Kiwanda cha sementi (Mamba cement) kilichoko Talawanda.
• Kiwanda cha Betri kilichopo katika kijiji cha Msoga.
• Kiwanda cha Magazeti kinachojulikana kwa jina la Jamhuri Media kilichopo katika kijiji cha Msolwa.

Halmashauri ya Chalinze kwa kushirikiana na Viongozi wa dini na Asasi za Kiraia pamoja na Wadau wengine wanaopinga matumizi ya dawa za kulevya wameweza kuwatambua wanaotumia dawa za kulevya ambao ndio nguvu kazi ya Taifa na hivyo kurahisisha mapambano dhidi ya dawa za kulevya.

Aidha katika kukabiliana na janga hili Halmashauri ya Chalinze imefanya yafuatayo:-

• Imetoa jumla ya Tshs. 100,000,000/= mikopo yenye masharti nafuu kwa Vikundi vya Vijana 42 ili waweze kushiriki ipasavyo kwenye shughuli za uzalishaji mali na kujiongezea kipato.
• Imefanya utambuzi wa vijana 20 wanaotumia dawa za kulevya katika kata za Bwilingu na Kiwangwa na zoezi ni endelevu.
• Imetenga 150,000,000/= kwa ajili ya kuwakopesha vijana kwa bajeti ya mwaka 2017/2018.
• Halmashauri kwa kushirikiana na Asasi ya Filbert Bayi Foundation chini ya KP Programme,  imefanikiwa kutoa elimu ya kutambua madhara ya kutumia dawa ya kulevya katika kata za  Bwilingu, Pera, Mbwewe, Msata na Kiwangwa.  

Ni ukweli usiopingika kuwa Rushwa ni kikwazo kikubwa cha maendeleo katika jamii yoyote yenye ari na mtazamo wa kuleta mabadiliko ya Kiuchumi.

TAKUKURU katika Halmashauri ya Chalinze imeendelea na juhudi za mapambano dhidi ya Rushwa ili kuunga mkono juhudi za Serikali za kuwaletea Wananchi Maendeleo endelevu katika nyanja mbalimbali.

Aidha katika kipindi cha Julai hadi Aprili 2017 TAKUKURU kwa kuhakikisha kuwa inapunguza kero za vitendo vya Rushwa kwa ustawi na maendeleo endelevu kwa Wananchi yafuatayo yalifanyika:-

• Kuendesha semina 25 (Wavulana 289, Wasichana 164),
• Mikutano ya hadhara 23 (Wanaume 1431, Wanawake 679), 
• Kuanzisha na kuimarisha Vilabu 23 vya wapinga Rushwa katika Shule za Msingi na Sekondari (Wavulana 1184, Wasichana 1381) na Maonyesho 2 yamefanyika. 
• TAKUKURU pia imegawa machapisho zaidi ya 105 yenye jumbe mbalimbali zenye kukemea Vitendo vya Rushwa katika Jamii na pia makala 1 imetolewa inayohusu mmomonyoko wa maadili ni chanzo cha kukithili kwa Rushwa Nchini Tanzania

Kwa matukio katika picha bofya hapa