Mwenyekiti wa Chama Cha Mapinduzi (CCM) Wilaya ya Bagamoyo, Abubakari Mlawa, amewapongeza viongozi wa Halmashauri ya Wilaya ya Chalinze na kuwataka madiwani kutekeleza kikamilifu ahadi walizowapa wananchi wakati wa kampeni

Imewekwa: December 6th, 2025

Mwenyekiti wa Chama Cha Mapinduzi (CCM) Wilaya ya Bagamoyo, Abubakari Mlawa, amewapongeza viongozi wa Halmashauri ya Wilaya ya Chalinze na kuwataka madiwani kutekeleza kikamilifu ahadi walizowapa wananchi wakati wa kampeni, kwa mujibu wa Ilani ya CCM.

Akizungumza leo Desemba 6, 2025 katika mkutano wa kwanza wa Baraza la Madiwani uliofanyika katika Ukumbi wa Canteen, Ofisi za Halmashauri ya Chalinze, Mwenyekiti Mlawa aliwapongeza viongozi wa Baraza, akiwemo Mwenyekiti na Makamu Mwenyekiti, kwa kuaminiwa na madiwani wenzao na kuchaguliwa kuongoza Halmashauri hiyo.

Aidha, aliushukuru uongozi wa Halmashauri kwa utekelezaji wa baadhi ya miradi iliyopangwa katika Ilani ya CCM, na kusisitiza kuwa chama kipo tayari kuendelea kushirikiana na uongozi huo katika kusukuma mbele ajenda za maendeleo.

Mwenyekiti Mlawa aliwataka Madiwani kutambua kuwa uteuzi wao ni matokeo ya imani ya chama na wananchi kwao, hivyo wanapaswa kufanya kazi kwa bidii na kuhakikisha kuwa wananchi wanapata majibu ya ahadi walizoahidiwa.

Mlawa alisema kuwa miezi michache ijayo itakuwa kipindi muhimu cha kupima utendaji wa madiwani hao, huku akisisitiza kuwa utekelezaji wa miradi na kusimamia masuala ya maendeleo utakuwa kipimo muhimu kuelekea chaguzi zijazo.

Katika hotuba yake, alitoa wito kwa madiwani kushirikiana kwa karibu na wataalamu wa Halmashauri,nakubainisha kuwa utaalamu wao ni nyenzo muhimu katika kusukuma mbele shughuli za maendeleo ya jamii.

“Niwaombe ndugu zangu, muwe na ushirikiano na wataalamu wetu,waheshimu taaluma zao kwa ajili ya kuhakikisha shughuli za maendeleo ya jamii zinasimamiwa ipasavyo,” alisema Mlawa.

Mwisho, aliwataka Madiwani kuendelea kuwa karibu na wananchi na kuhakikisha kuwa malengo ya maendeleo yaliyowekwa yanatekelezwa kwa manufaa ya jamii yote ya Chalinze.