Mwenyekiti wa Halmashauri afanya kikao kazi na madereva wa Halmashauri

Imewekwa: September 9th, 2022

.

Mwenyekiti wa Halmashauri ya Wilaya ya Chalinze Mhe, Hassan Rajabu Mwinyikondo jana amekutana na kufanya kikao na madereva wote wa Halmashauri ambapo kikao hicho kililenga kuhakikisha ukusanyaji wa mapato unaongezeka kwa kasi na kuziba mianya ya uvujaji wa mapato.

Mheshimiwa Mwenyekiti huyo alisema kuwa kikao hicho kimelenga hasa kuwafanya madereva wote wa Halmashauri kuwa sehemu ya timu ya ukusanyaji wa mapato kwani wao ni moja ya sehemu ya Halmashauri.

“Tumeamua kukutana na madereva na dhamira yetu kubwa ni kuwaelekeza na kuwakumbusha kuwa wao ni sehemu ya kuisaidia Halmashauri juu ya ukusanyaji wa mapato kwani wao ni moja ya watu wanaojua na kukutana na watu wanaokwepesha mapato kwasababu wao ni watumiaji wakubwa wa magari na hivyo basi tumewaambia kuwa ifike mahala tusaidiane kuhakikisha kuwa wale wakwepeshaji katika kila sehemu ya Halmashauri  tunawakamata kwa kupitia watumishi mbalimbali.” Alisema Mhe. Mwinyikondo.

Aidha Mhe. Mwinyikondo aliongeza kwa kusema kuwa Halmashauri ya Wilaya ya Chalinze imejipanga kutoa motisha kwa madereva ambao watawafichua wale wote wanaokwepa kulipa ushuru.

Naye Afisa utumishi wa Halmashauri ya Wilaya ya Chalinze ndg. Archanus Kilaja amemshukuru Mheshimiwa Mwenyekiti kwa kikao hichi cha kukutana na madereva na vile vile alitoa nasaha kwa madereva hao ambao wamepewa majukumu hayo mapya katika kuzuia upotevu wa mapato

“Kwanza nimshukuru Mheshimiwa Mwenyekiti kwa kikao hiki lakini pia niwakumbushe watumishi wenzangu madereva kuwa kitu Kikubwa ni kuwa mwaminifu na muadilifu na msitahimilivu kwani hivyo vitu ndio changamoto ya watu wengi hivyo  basi tuwe watumishi waaminifu,waadilifu na pia wastahimilivu ili tuweze kufanya majukumu haya ambayo tumeambiwa”.Alisema Ndg. Kilaja.

Ikumbukwe kuwa kikao hicho mahsusi kimehusisha Mheshimiwa Mwenyekiti wa Halmashauri ya Wilaya ya Chalinze,Afisa Utumishi kwaniaba ya Mkurugenzi Mtendaji ,Mweka hazina pamoja na madereva wote wa Halmashauri ya Chalinze.