Mwenyekiti wa Halmashauri awapongeza walimu Chalinze

Imewekwa: May 24th, 2024

MWENYEKITI WA HALMASHAURI  AWAPONGEZA WALIMU WA SHULE ZA MSINGI CHALINZE 

Mwenyekiti wa Halmashauri ya Wilaya ya Chalinze,Mheshimiwa Hassani Mwinyikondo amewapongeza walimu wa Shule za Msingi katika Halmashauri ya Chalinze kwa kazi nzuri wanazozifanya za utoaji taaluma ndani ya Halmashauri ya Chalinze.

Pongezi hizo zimetolewa leo hii katika kikao kazi cha walimu wa Shule za Msingi kilichofanyika katika Ukumbi wa mikutano wa Jakaya Kikwete. Mheshimiwa Mwinyikondo ametoa pongezi na kutoa zawadi kwa Shule zilizofanya vizuri katika katika matokeo ya mtihani wa darasa la saba mwaka 2023,Shule zilizozawadiwa ni zile zilizopata wastani mzuri wa ufaulu kwa maana ya Shule tatu za Serikali na tatu za binafsi zenye ufaulu mzuri katika Halmashauri ya Chalinze,Pamoja na Maafisa Elimu kata watatu waliofanya vizuri kiwilaya.

Shule zilizopatiwa zawadi kwa upande shule za Msingi za serikali ni Mpaji ,Kibiki na Bwilingu “B”. Kwa upande wa shule za binafsi zilizopata zawadi ni Sirajul Munir Islamic,Bwani Universal Pre and Primary School na St.Alphonsa Pre &Primary School. Viwango vya zawadi kwa Shule za Serikali mshindi wa kwanza alipatiwa shilingi laki 5,mshindi wa pili laki 4 na mshindi wa tatu laki 3. Kwa Shule za binafsi mshindi wa kwanza alipata laki 3,wa pili laki 2 na mshindi wa tatu laki 1.

Mwenyekiti wa Halmashauri katika hotuba yake aliyoitoa katika kikao kazi hicho alitoa pongezi kwa shule zilizofanya vema na kuitaka Idara ya Elimu Msingi kufanya msawazo wa walimu ndani ya Halmashauri kwa kuweka usawa wa walimu walio maeneo ya mjini na vijijini ili ufaulu ukaongezeke katika maeneo yote. Hali kadhalika Mwenyekiti amezitaka shule kuweka utaratibu wa namna ya upatikanaji wa Chakula mashuleni ili kuinua kiwango cha ufaulu kwani endapo wanafunzi watapata chakula cha mchana kutatoa motisha kwa watoto kuhudhuria kikamilifu shuleni na kiongeza ufaulu.

Katika kuongeza ufaulu Mheshimiwa Mwinyikondo amewataka walimu kama walezi kuwalinda wanafunzi wao kwa kushirikiana na wazazi katika kupambana na watu wenye nia mbaya juu ya watoto wa kike ili wasipate mimba wangali bado wanasoma.