Mwinyikondo: Wasimamieni watendaji wa Serikali

Imewekwa: December 2nd, 2022

Mwenyekiti wa Halmashauri ya wilaya ya Chalinze,Mheshimiwa Hassani Mwinyikondo amewataka wenyeviti wa Vijiji kuwasimamia watendaji wa Serikali katika maeneo yao katika suala zima la utendaji wa majukumu mbalimbali ya Serikali kwa kuzingatia Sheria,Taratibu na Kanuni.

Maelekezo hayo ameyatoa katika kikao kazi kilichojumuisha wenyeviti wa Vijiji,watendaji wa Vijiji ,watendaji wa kata na wakuu wa Divisheni na Vitengo katika Halmashauri ya Wilaya ya Chalinze kilichofanyika leo katika Ukumbi wa Jakaya Kikwete na kujadili changamoto mbalimbali zinazowakabili katika utekelezaji wa majukumu katika maeneo yao ya Utawala. Mwenyekiti wa Halmashauri amewataka viongozi na watendaji Kusimamia ukusanyaji wa mapato ya Halmashauri ambayo ni chanzo cha utekelezaji wa miradi mbalimbali ya Maendeleo kama Afya,Elimu na Maji na kuhakikisha ukwepaji wa kulipa mapato unakomeshwa na mapato yote yaingie katika mfuko wa Halmashauri.

Sanjari na maelekezo hayo Mwinyikondo amewataka watendaji wa Serikali kufanya kazi za kitendaji na Viongozi wa kisiasa wafanye kazi za kisiasa.

“Wenyeviti wa Vijiji acheni kuungana na watendaji kunyanyasa wananchi ni kinyume cha Sheria na Maadili ya uongozi.” Mwinyikondo alisisitiza.

Katika Kikao Kazi hicho baadhi ya wenyeviti wa Vijiji walitoa michango yao ya mawazo kwa kuwataka watendaji na wanasiasa kufanya kazi kwa ushirikiano na Uhusiano mzuri kwa misingi ya kuwatumikia wanachalinze na watanzania kwa ujumla.