Naibu Waziri wa Ardhi akagua miradi ya Maendeleo Chalinze

Imewekwa: January 9th, 2023

Naibu Waziri wa Ardhi Nyumba na Maendeleo ya Makazi, Ridhiwani Kikwete amekagua miradi ya Maendeleo inayotekelezwa katika Jimbo lake la Chalinze,Mheshimiwa Ridhiwani ameweza kutembelea miradi mbalimbali katika kata ya Bwilingu. Miradi aliyoikagua ni miradi ya sekta ya Elimu,Maji na Afya.

Katika ukaguzi wa miradi hiyo,Naibu Waziri alitembelea na kukagua Ujenzi wa Madarasa katika Shule ya Sekondari,Chahua na kukagua jumla ya madarasa matano (05) yaliyojengwa kutokana na fedha kutoka Serikali kuu jumla ya fedha za kitanzania milioni 100. Sanjari na ukaguzi huo alikagua ujenzi wa Shule mpya inayojengwa katika kitongoji cha Msolwa,shule hiyo imejengwa kutokana na fedha kutoka Serikali kuu jumla ya fedha za kitanzania milioni 470.

Aidha Mheshimiwa Kikwete alitembelea na kuona ujenzi wa Tanki la maji linalojengwa kwa ajili ya kupeleka maji katika kijiji cha Mtambani na Shule ya Sekondari ya Msolwa ambayo inaendelea kujengwa. Mradi huu wa maji utakapokamilika utakuwa mkombozi kwa wananchi wa Mtambani na Msolwa kwa ujumla.

Katika sekta ya Afya Mheshimiwa Ridhiwani alikagua ujenzi wa zahanati ya Kitongoji cha Mtambani ambayo inajengwa kwa nguvu za wananchi na fedha za mapato ya ndani. Katika ziara hiyo Naibu Waziri ameipongeza Menejimenti ya Halmashauri ya wilaya ya Chalinze kwa usimamizi mzuri wa miradi ya Maendeleo na kukamilika katika hali ya ubora na viwango vinavyotakiwa.