Pongezi zatolewa kwa Halmashauri ya Wilaya ya Chalinze na watendaji wake

Imewekwa: August 30th, 2019

Mkuu wa Wilaya ya Bagamoyo Bi. Zainabu Mfaume Kawawa ameipongeza Halmashauri ya Wilaya ya Chalinze kwa  ukusanyaji wa mapato kwa mwaka wa fedha 2018/2019 ikilinganishwa na ule wa mwaka wa fedha wa 2017/2018 na kusaidia kufikia lengo la ukusanyaji  wa mapato kwa zaidi ya asilimia mia moja, kwani katika mwaka wa fedha wa 2017/2018 Halmashauri ilikusanya kiasi cha Tsh Bilioni 4.3 sawa na asilimia 91 na Tsh. Bilioni 7.6 kwa mwaka wa fedha wa 2018/2019 sawa na asilimia 132.

Mh. Mkuu wa Wilaya aliyasema hayo kwenye kikao cha baraza la madiwani  ROBO YA NNE  ya mwaka wa fedha 2018/2019 kilichofanyika katika ukumbi wa Halmashauri ya Wilaya ya Chalinze siku ya Alhamisi Tarehe 29/08/2019.

‘’Naipongeza sana Halmashauri yetu ya Chalinze kwa kufanikiwa ukusanyaji wa mapato na kuifanya Halmashauri ya Chalinze kuwa kinara  kitaifa kati ya Halmashauri zote Nchini na kufikia lengo, hii ni kutokana na jitihada na ushirikiano ulioonyeshwa na Mkurugenzi wa Halmashauri, Madiwani, Wajumbe, Watendaji na Wananchi kwa ujumla.’’

Vilevile  Mh. Mkuu wa Wilaya ameiagiza kamati ya Elimu kupitia kwa afisa elimu kusimamia usajili wa shule zote zinazotoa huduma ya elimu haliyakuwa hazikusajiliwa

 Bi.Zainabu Kawawa hakuliacha suala la utoro na mimba mashuleni hii ni kutokana na kuwapo kwa wimbi kubwa la mimba na utoro mashuleni hasa katika shule za sekondari za kata kwa kutolea mfano shule ya sekondari ya Msata alipoenda kuitembelea shule hiyo na kupata orodha ya wanafunzi wenye ujauzito takribani  wanafunzi 8 kuanzia mwezi  Januari mpaka Agosti 2019 na kuagiza madiwani kuhakikisha mimba mashuleni zinatoweka kabisa.

‘’Ndugu Madiwani kutokana na hili mnatakiwa kuhahakisha mnazitembelea shule zenu za kata kwa kutenga siku kadhaa na kwenda kuongea na wanafunzi katika shule hizo kwani ninyi ndio walezi na hili suala si la mkuu wa wilaya peke yake kwani hili suala ni la wote na Taifa kwa ujumla ili kufanikisha maendeleo nchini.’’

Kwa upande wa ulinzi na usalama mheshimiwa Mkuu wa Wilaya ameiagiza kamati ya ulinzi na usalama kufuatilia kesi zote zilizotokea na kuhakikisha usalama kwa raia wake.

‘’Naiagiza kamati ya ulinzi na usalama kufuatilia kesi zote za mauaji na  matukio ya uovu ili kuhakikisha usalama na kuondoa hofu kwa wananchi ili waweze kufanya shughuli zao za maendeleo kwa amani.’’Alisema Bi Zainabu

 Pia suala la migogoro ya wafugaji wavamizi ambao wamekuwa na tabia ya kuvamia maeneo na hili ni kutokana na wenyeviti wa vitongoji kuwakaribisha wageni kwa kuwapa ardhi na kuwaomba kuacha mara moja tabia hiyo na pia alitoa agizo kwa wafugaji wavamizi hao waondoke maramoja kwani wasipifanya hivyo watachukuliwa hatua stahiki.

Na mheshimiwa mkuu wa wilaya alimalizia kwa kuishukuru kamati nzima ya maendeleo, mkurugenzi  na wajumbe wote kwa ushirikiano waliounesha katika kufanikisha mbio za Mwenge wa uhuru na kutoa neno kwa viongozi kutojihusisha na kupanga viongozi kwenye uchaguzi wa serikali za mitaa utakaofanyika mwezi Novemba mwaka huu kwani jukumu kubwa na la  muhimu kwa watendaji na viongozi wote ni kuhakikisha uhamasishaji wa wananchi kushiriki kikamilifu katika uchaguzi kwa kutoa taarifa mara kwa mara kuhusu uchaguzi huo.    

Kabla ya kufunga Baraza hilo Mwenyekiti wa Halmashauri ya Wilaya ya Chalinze Bw.Saidi Zikatimu ameiagiza kamati ya elimu kwa kusema,

‘’Naiagiza kamati ya elimu katika kikao kijacho ituletee idadi kamili za shule zote za binafsi na za serikali ambazo bado hazijasajiliwa ili kujua na kuzifanyia utaratibu wa usajili ili kutengeneza elimu iliyo bora wilayani kwetu na taifa kwa ujumla.’’ Alisema

Vikao hivyo vya baraza hukaliwa kila baada ya robo ya mwaka wa fedha katika Halmashauri kwa lengo la kujadili maendeleo yaliofanywa na serikali na kutatua changamoto mbalimbali zinazoikabili Halmashauri kwa maendeleo zaidi.