Possi: Hakikisheni mnatokomeza sifuri kwa kusimamia ufundishaji Chalinze

Imewekwa: February 4th, 2026

Mkurugenzi wa Halmashauri ya Wilaya ya Chalinze, Bwana Ramadhani Possi, amekutana na Wakuu wa Shule za Sekondari kwa ajili ya kufanya tathmini ya matokeo ya Mtihani wa Kidato cha Nne na Kidato cha Pili kwa mwaka 2025, pamoja na kujadili changamoto zinazoikabili sekta ya elimu ya sekondari katika halmashauri hiyo.

Kikao kazi hicho kilihusisha Wakuu wa Shule za Sekondari 39, zikiwemo shule za Serikali na binafsi, na kililenga kubaini hali ya ufaulu, changamoto zilizopo na kuweka mikakati ya kuboresha zaidi matokeo ya wanafunzi.

Akitoa taarifa ya matokeo ya mitihani, Afisa Elimu Sekondari wa Halmashauri ya Chalinze, Mwalimu Godwin Mukaruka, alisema kuwa wastani wa ufaulu wa Mtihani wa Kidato cha Nne kwa mwaka 2025 ni asilimia 89, huku Mtihani wa Kidato cha Pili ukiwa na wastani wa ufaulu wa asilimia 83.3.

Katika kikao hicho, Mkurugenzi Possi aliwapongeza walimu na Wakuu wa Shule kwa juhudi kubwa wanazoendelea kuziweka katika ufundishaji na usimamizi wa taaluma, hali iliyochangia kupatikana kwa matokeo hayo chanya. Alisisitiza kuwa mafanikio hayo ni matokeo ya ushirikiano mzuri kati ya walimu, uongozi wa shule na halmashauri kwa ujumla.

Hata hivyo, Mkurugenzi aliwataka Wakuu wa Shule kuongeza jitihada katika kufuatilia kwa karibu ufundishaji wa walimu, kusimamia nidhamu ya kitaaluma na kuweka mikakati madhubuti ya kuondoa kabisa ufaulu wa sifuri katika halmashauri ya Chalinze.

Kwa upande wao, Wakuu wa Shule walipokea maelekezo hayo na kuahidi kuyafanyia kazi kwa vitendo, kwa kushughulikia mapungufu yote yaliyobainishwa katika ufundishaji na ujifunzaji, kwa lengo la kutokomeza sifuri na kufikia ufaulu wa asilimia 100 katika mitihani ijayo.