PPRA yatoa mafunzo ya Ununuzi kwa watumishi wa Afya Chalinze

Imewekwa: May 7th, 2025

Na John Mlyambate 

Mamlaka ya Ununuzi wa Umma Tanzania (PPRA) kwa kushirikiana na Kitengo cha Manunuzi katika Halmashauri ya Wilaya ya Chalinze imetoa mafunzo ya namna ya kufuata taratibu za ununuzi wa umma kwa watumishi wa sekta ya afya ngazi ya chini. Mafunzo hayo yamelenga kuwajengea uwezo watumishi hao katika kusimamia manunuzi kwa kuzingatia sheria, taratibu na kanuni zinazotawala ununuzi wa umma nchini.

Mafunzo haya yamewaleta pamoja watumishi wa sekta ya afya kutoka vituo mbalimbali vya huduma ya afya ndani ya halmashauri hiyo, ambapo wamepatiwa elimu kuhusu majukumu yao katika mchakato wa ununuzi na namna bora ya kushirikiana na afisa manunuzi katika taasisi zao. Washiriki walifahamishwa pia juu ya nafasi ya PPRA kama msimamizi wa shughuli za ununuzi nchini.

Mwezeshaji wa mafunzo hayo, Bi. Veronica Fute, alieleza kwa kina wajibu wa mtunza stoo katika taasisi, ikiwemo kutunza kumbukumbu sahihi za vifaa, kufanya uhakiki wa vifaa vilivyopo, na kuhakikisha vifaa vinavyohitajika vinaagizwa kwa wakati ili kuimarisha utoaji wa huduma. Alisisitiza umuhimu wa kuweka mipango mizuri ya manunuzi kulingana na mahitaji halisi ya huduma.

Bi. Fute pia alizungumzia majukumu ya idara tumizi katika mchakato wa ununuzi wa umma, akibainisha kuwa idara hizo ndizo zinazotambua mahitaji halisi ya vifaa na huduma. Hivyo, ni muhimu kwa idara hizo kushirikiana kwa karibu na maafisa manunuzi ili kuhakikisha vifaa vinavyoagizwa vinakidhi malengo ya taasisi.

Katika mafunzo hayo, washiriki walihimizwa kuzingatia maadili ya kazi kwa kuwa waaminifu, waadilifu na kuepuka mianya ya rushwa katika mchakato wa ununuzi wa umma. Bi. Fute alisisitiza kuwa ufanisi wa manunuzi unategemea kwa kiasi kikubwa uzingatiaji wa sheria na taratibu zilizowekwa na mamlaka husika.

Kwa ujumla, mafunzo haya yamelenga kuimarisha utendaji kazi wa watumishi wa afya katika Halmashauri ya Wilaya ya Chalinze kwa kuhakikisha kuwa shughuli za ununuzi zinafanyika kwa uwazi, ufanisi na kwa kuzingatia matumizi bora ya fedha za umma.