Profesa Shemdoe akagua Miradi ya Maendeleo Chalinze

Imewekwa: November 16th, 2022

                                                     Na John Mlyambate 

Katibu Mkuu Ofisi ya Rais Tawala za Mikoa na Serikali za Mitaa,Profesa Riziki Shemdoe leo ameweza kukagua miradi mbalimbali ya Maendeleo katika Halmashauri ya Wilaya ya Chalinze Mkoani Pwani inayotekelezwa na Serikali ya awamu ya sita chini Rais Samia Suluhu Hassan.

Miradi iliyokaguliwa na Katibu Mkuu ni miradi ya Elimu inayotekelezwa kote nchini,miradi hiyo ni Ujenzi wa vyumba vya madarasa kwa ajili ya wanafunzi watakaoanza masomo ya kidato cha kwanza Januari 2023,Profesa Shemdoe alikagua ujenzi wa madarasa katika shule ya Sekondari Chahua,na shule ya Sekondari Lugoba na kuridhishwa na hatua mbalimbali za utekelezaji wa mradi huo na kuwapongeza wasimamizi wote wa mradi kuanzia Menejimenti ya Halmashauri,Madiwani na walimu kwa usimamizi mzuri uliopelekea madarasa hayo kujengwa kwa kiwango stahiki.

“Nikupongeze Mkurugenzi na timu yako kwa usimamizi makini,Madiwani na Uongozi wa Shule kwa maana ya wakuu Shule wote wanaoendelea na utekelezaji wa miradi hii,nawaomba muongeze bidii mara ifikapo tarehe 15 Desemba madarasa yawe yamekamilika.” Profesa Shemdoe aliagiza.

Katibu Mkuu ,Profesa Shemdoe aliweza pia kukagua Ujenzi wa soko la Bwilingu na kuona ubora wake pia alikagua hatua za awali za ujenzi wa vibanda vya wajasiriamali vinavyoendelea kujengwa kuzunguka soko, jumla ya vibanda hivyo ni 150 na vinajengwa kutokana fedha za mapato ya ndani ya Halmashauri ili kuweza kuwakwamua wananchi kutokana na Umasikini uliokithiri.

“Mara ukikakamilika ujenzi wa vibanda hivi wapewe wananchi sisi Watumishi tusijiingize katika umiliki wa vibanda hivi wapatiwe walengwa waliokusudiwa.” Katibu Mkuu alitoa rai yake.

Mara baada ya Ukaguzi wa soko, Katibu Mkuu alienda katika hospitali ya Wilaya ya Msoga na kukagua Ujenzi wa Kituo cha Matibabu ya Dharura(EMD) kinachoendelea kujengwa katika hospitali hiyo,Profesa Shemdoe alifurahishwa na utekelezaji wa mradi huo na kumshukuru Rais Mstaafu wa awamu Nne,Dkt Jakaya Mrisho Kikwete kwa kuwezesha upatikanaji wa mradi huo unaotekelezwa kwa faida ya watanzania wanapopatwa na ajali na kuwa na uhakika wa matibabu wakati wowote.

Aidha Profesa Shemdoe alikagua na kujionea Vifaa tiba mbalimbali katika hospitali ya Msoga vilivyonunuliwa kutokana na fedha za Mapato ya ndani ya Halmashauri na fedha kutoka Serikali kuu,vifaa hivyo ni vifaa vya Mionzi (X-ray)na vipimo vya moyo vinavyopima Umeme wa moyo kwa binadamu. Katibu Mkuu alipongeza uongozi wa Halmashauri kwa maana ya Madiwani na Menejimenti ya Halmashauri kwa hatua kubwa za kimaendeleo zinazofanywa na uongozi.

“Nafurahia kuwa sehemu ya mafanikio katika Halmashauri ya Chalinze na sijutii kufanya ziara hii hakika mmenifurahisha kwa matendo makubwa mnayoyafanya ya kuwahakikishia afya bora wanachalinze na watanzania kwa ujumla.” Shemdoe alisema.